Տպել
Օրերս երգչուհի եւ դերասանուհի Ռիփփին նոր՝ ամանորյա ֆոտոշարք է ներկայացրել: Այդ առիթով Life.panorama.am-ը զրույց է ունեցել նրա հետ, ինչպես նաեւ երգչուհու հետ միասին ամփոփել է անցնող 2018-ը:
«Ֆոտոշարքիս հեղինակը, ինչպես միշտ, Վահե Ստեպն է, ում հետ աշխատում եմ վերջին շրջանում: Վահեի հետ համագործակցելն ինձ հաճույք է պատճառում, մենք արդեն շատ մոտ ընկերներ ենք. Միասին մենք ստանում ենք այն, ինչ ուզում ենք ու դեռ ավելին: Ցանկանում էինք ստանալ Սուրբ ծննդյան հրեշտակի կերպար, իհարկե, իմ մատուցմամբ, որի նմանը կարծես թե մեզ մոտ չեմ հանդիպել: Հագուստի եւ կերպարի ընտությունն իմն էր, այդ հարցում ինձ մի փոքր օգնել է Հելեն Տիտանյանը»,- նշեց Ռիփփին:
Անդրադառնալով 2018-ի լավ ու վատ կողմերին՝ երգչուհի նկատեց.
«Տարին ինձ համար հաջող էր, հասցրեցի ահագին գործեր իրականացնել, որոնց մի մասը դեռեւս ընթացքի մեջ են ու կավարտեմ 2019-ին: Անցնող տարին բուռն աշխատանքային էր, 2018-ը կարող եմ համարել ձեռքբերումների տարի: Վատ ու ստվերային կողմեր, իհարկե, եղել են, բայց դրանք իսկապես շատ մանր հարցերում են արտահայտվել, ուստի հիմա դրանք հիշել ու մատնանշել չեմ կարող»:
Ռիփփին բացահայտեց՝ իր համար տարիները սկիզբ ու ավարտ չունեն, կա կյանք, որը փորձում է վայելել:
«Ես չեմ մտածում՝ այ այս տարի սա կանեմ, հաջորդ տարի՝ մեկ այլ բան: Ինձ համար ժամանակը սահմանափակումներ չունի, ես այն տարիների իմաստով չեմ հաշվում: Այս պատճառով Ամանորին նախորդ տարվա փակում ու նոր տարվա բացում չեմ անում. Նոր տարին պարզապես իմ ամենասիրելի ու հեքիաթային տոներից է, այդ օրը ես ուղղակի վայելում եմ այդ տոնը»,- ընդգծեց նա:
2018-ը Ռիփփին շատ բաներ է սովորեցրել.
«Ես միշտ փորձում եմ նոր բաներ վերցնել, սովորել: Այս իմաստով 2018-ն ինձ համար շատ հետաքրքիր տարի էր: Հին ճապոնական գաղտնի պահված գիտությունները ուսումնասիրելիս՝ նոր ձեռքբերումներ ունեցա, էներգետրիկ նոր վարժությունների սկսեցի տիրապետել: Նաեւ որպես դերասանուհի եւ երգչուհի՝ նոր բաներ սովորեցի. Այդ ամենն ինձ համար շատ կարեւոր են»,- հավելեց մեր զրուցակիցը:
Անձնական կյանքում եւս անցնող տարին Ռիփփիի կյանքում դրական հետք է թողել.
«Անձնական իմաստով եւս 2018-ը հոյակապ տարի էր՝ լավ էմոցիաներով լի, եւ ամենակարեւորը՝ այդ ամենը 2018-ի ավարտով չի փակվում, շարունակվում է»,- նկատեց նա:
2019-ի հետ կապված Ռիփփին մեծ նպատակներ ունի, որոնք առընչվում են ինչպես իր, այնպես էլ բնապահպանության հետ:
«2019-ի համար արդեն հաստատված գործնական պայմանավորվածություններ կան, որոնք, հույս ունեմ, անպայման կիրականանան: Շատ կարեւոր ցանկություն ունեմ՝ Հայաստանում եւ աշխարհում լուծվեն բնապահպանական խնդիրները: Ուզում եմ, որպեսզի անտուն կենդանիների հարցը եւս լուծում ստանա, եւ այդ ուղղությամբ ինքս քայեր ձեռնարկում եմ, սակայն մեկ, երկու հոգով հարց չի լուծվի»,- ավարտեց երգչուհին՝ նախապես շնորհավորելով բոլորի Ամանորն ու Սուրբ Ծնունդը:
