«Աղցաններ պատրաստելիս պետք է հիշել մի կարևոր հանգամանք». մասնագետի խորհուրդները

«Աղցանների պատրաստման ժամանակ պետք չէ ավելացնել այն բաղադրիչները, որոնք ունեն կարճ պիտանելիության ժամկետ, դրանք պետք է ավելացնել մատուցելիս»,- 168.am-ի հետ զրույցում այս մասին ասաց ԳԱԱ Էկոկենտրոնի սննդի ռիսկերի գնահատման կենտրոնի ղեկավար, սննդագիտության դոկտոր Դավիթ Պիպոյանը։

«Ձուն անգամ խաշած վիճակում կարճ պիտանելիության ժամկետ ունի, և խորհուրդ չի տրվում ամանորյա աղցանների մեջ այն նախապես ավելացնել։ Դա վերաբերում է նաև թթվասերին կամ մայոնեզին»,- ասաց նա՝ ընդգծելով՝ որպես կանոն, ամեն տարի Նոր տարվա թունավորումների դեպքերը հիմնականում լինում են կամ աղցաններից, կամ ալկոհոլային խմիչքների չարաշահումից, կամ խառը սնունդ ընդունելուց։

«Պետք է հիշել կարևոր հանգամանք, որ թթվասերով և մայոնեզով պատրաստված աղցանը, եթե սենյակային ջերմաստիճանում է պահվում, այն արդեն 6 ժամ հետո հանդիսանում է ռիսկային։ Եթե առավոտյան պատրաստել եք թթվասերով և մայոնեզով աղցանները, ապա այն փոքր չափաբաժինները, որոնք մնացել են, աշխատեք դրանց վրա նոր չափաբաժին չավելացնել, դրանք թափեք։ Եթե միկրոֆլորան արդեն զարգացել է դրա մեջ, և նորից ավելացնում եք այլ չափաբաժին, այդ միկրոօրգանիզմները շարունակում են մնալ այդ աղցանի մեջ»։

Ռազմիկ Մարտիրոսյան