Տպել
Հայտնի թիֆլիսահայ, մեկենաս, XIX-XX դարերի ամենահարուստ մարդկանցից մեկի` Ալեքսանդր Մանթաշյանցի տունը հանվել է վաճառքի։
Վրաստանում Հայաստանի դեսպանատունը հաճույքով ներկա շենքից կտեղափոխվեր հայտնի թիֆլիսահայ մեկենաս, XIX-XX դարերի ամենահարուստ մարդկանցից մեկի` Ալեքսանդր Մանթաշյանցի տուն։
Սակայն տվյալ պահին դա իրատեսական չէ, Sputnik Արմենիայի թղթակցի հետ զրույցում ասաց Վրաստանում Հայաստանի դեսպանատան հասարակայնության հետ կապերի, տեղեկատվության և մամուլի բաժնի պետ Հարություն Հայրապետյանը։
Բանն այն է, որ հունվարի 13-ին Թբիլիսիի Հայերի միությունը և մտավորականության ներկայացուցիչները բաց նամակով դիմել են Հայաստանի վարչապետ Նիկոլ Փաշինյանին։ Նամակում նրանք խնդրում են փրկել մեծն Մանթաշյանցի տունը։ Նամակը հրապարակվել է «Հայաստան-Աշխարհի հայեր» ֆեյսբուքյան էջում։ Սեփականատերը վաճառքի է դրել տունը։
Sputnik Արմենիայի տվյալներով` խոսքը 10 միլիոն դոլարի մասին է։ Նամակի նախաձեռնողներն առաջարկում են Հայաստանի կառավարությանը գնել այդ տունը։
Այնտեղ կարող է գտնվել Վրաստանում Հայաստանի դեսպանատունը կամ այն կարող է դառնալ հայ-վրացական տնտեսական-մշակութային կապերի կենտրոն։
«Կոսմետիկ վերանորոգումից հետո այս տանը Հայաստանի Հանրապետության դեսպանատունը տեղակայելը հատկապես ակտուալ է, քանի որ մեզ` Թբիլիսիի հայերիս համար վիրավորական է այսպես կոչված Շների փողոցում` վատ հարմարեցված շենքում, դեսպանատան գտնվելը», – ասվում է հաղորդագրության մեջ։
Մանթաշյանցի տունը գտնվում է Վրաստանի մայրաքաղաքի կենտրոնում, խորհրդային շրջանում այնտեղ գործել է Վրաստանի արվեստի գործիչների կենտրոնը, այնուհետև այն մասնավոր սեփականություն է դարձել։ Տանը պահպանվել են այն ժամանակի կահավորանքի բոլոր տարրերը, երբ այնտեղ բնակվելիս են եղել Մանթաշյանցները։ Ներկա պահին երկհարկանի դատարկ առանձնատունը վաճառքի է դրված և կարող է վերջնականապես կորսվել։
Հարություն Հայրապետյանը չհաստատեց տան գինը` հաղորդելով, որ խոսքը մեծ գումարի մասին է։
«Դրությունից դուրս գալու միակ ելքը տունը գնելն է։ Սակայն հարցն այն է, թե Հայաստանն ունի արդյոք այդքան մեծ գումար»,- ասաց Հայրապետյանը։
Նա նշեց, որ դեսպանատունն ուրախությամբ ձեռք կբերեր ոչ միայն այդ շենքը, այլ նաև բոլոր տները, որոնք պատկանում են հայերին և կառուցվել են նրանց կողմից։
