Տպել
Ընտրություններից հետո գրեթե բոլոր երկրներում ժամանակն ամեն դեպքում «սեղմվում» է հաղթանակ տարած ուժի շուրջ: Քաղաքագետ Գագիկ Համբարյանն այն կարծիքին է, որ Հայաստանն այդ առումով ևս բացառություն չէ:
«Առհասարակ հաղթանակ տարած ուժերն ավելի մեծ պատասխանատվություն են կրում հասարակության առաջ, քան ունեցել են նախկինում, երբ եղել են ոչ իշխանական կամ ընդդիմություն հանդիսացող քաղաքական ուժեր: Նույնը այս պարագայում վերաբերում է «Իմ քայլը» դաշինքին: Եթե մինչև ԱԺ ընտրությունները հասարակության մեծ մասը Նիկոլ Փաշինյանի կառավարության բացթողումներին ու սխալներին ըմբռնումով էր մոտենում, և շատ դեպքերում ասում էր՝ եկե՛ք ժամանակ տանք, իսկ Ն. Փաշինյանն անընդհատ խորհրդարանական որոշ ուժերի մեղադրում էր հակահեղափոխություն կազմակերպելու փորձի մեջ, հիմա այդ վտանգը չկա: Հիմա ամբողջ իշխանությունը նրանց ձեռքում է: Հայաստանի նման փոքրիկ և քիչ բնակչություն ունեցող երկրում ակտիվ բարեփոխումներ կազմակերպելն այդքան էլ մեծ խնդիր չպետք է լինի: Եթե բարեփոխումները շատ արագ տեղի չունեցան, և հասարակությունն իր մաշկի վրա չզգաց այդ բարեփոխումների արդյունքները, ապա գործող իշխանությունները կունենան շատ մեծ խնդիրներ»,–մեզ հետ զրույցում ասաց քաղաքագետը՝ հավելելով, որ 9 ամիսն այդքան էլ քիչ ժամանակ չէ:
«Ըստ էության, իշխանությունը հասարակության պահանջներն իրագործելու համար արդեն պետք է մտածի կոնկրետ լուրջ քայլեր ձեռնարկելու մասին: Գործող իշխանությունները տեսան, թե հասարակությունն ինչպես արձագանքեց Սերժ Սարգսյանի՝ իշխանության վերարտադրման փորձերին: Հասարակությունը նաև թավշյա հեղափոխության կազմակերպիչ Նիկոլ Փաշինյանի կողքին կանգնելով՝ իր պատասխանը տվեց Սերժ Սարգսյանին, որը տասը տարիների ընթացքում չկատարեց իր խոստումների գրեթե 99 տոկոսը: Եվ հիմա այդ նույն հասարակությունը, որը հավատում է իր ուժերին և գիտի, որ փողոցային պայքարով կարող է իշխանություններին պարտադրել իր կամքը, կարող է նաև նույն կերպ վարվել Նիկոլ Փաշինյանի իշխանության հետ, եթե չկատարեն հասարակությանը տված խոստումների գոնե կեսը»,–ասաց նա՝ ընդգծելով, որ քաղաքական դաշտում ճգնաժամ կլինի, եթե խորհրդարանական ընդդիմադիր ուժերը, որպես ընդդիմություն, չկարողանան իրենց դերը կատարել:
«Այդ ժամանակ կունենանք խնդիր, ըստորի՝ հասարակության ձայնը լսել կտան արտախորհրդարանական ուժերը, իսկ այդպիսի ուժեր արդեն իսկ գլուխ են բարձրացնում: Խոսքը նախ ՀՀԿ–ի մասին է, որը «հինգ պակաս» արդեն մտնում էր խորհրդարան: Իշխանությունները պետք է հասկանան, որ ՀՀԿ–ի հավաքած 60 հազար ձայնը փոքր թիվ չէ: Երբ 60 հազար ընտրող իր ձայնը տալիս է ՀՀԿ–ին, դա հենց իրենց խնդիրն է: Բացի այդ, գործող իշխանություններին ընդդիմադիր լինելու մասին արդեն հայտարարեցին նաև դաշնակցականները: Մի կուսակցություն, որը բավականին ուժեղ դիրքեր ունի հայկական Սփյուռքում, ունի նաև ահռելի մեծ ֆինանսական ռեսուրսներ: Այդ ամենը կարող է օգտագործվել ՀՀ գործող իշխանությունների դեմ, եթե նրանք շոշափելի արդյունքների չհասնեն թե՛ սոցիալ–տնտեսական, թե՛ այլ ոլորտներում»:
Ինչ վերաբերում է ԱԺ աշխատանքին, ապա, ըստ քաղաքագետի, մեծամասնություն կազմող «Իմ քայլը» խմբակցությունն այստեղ բավականին մեծ խնդիրներ ունի մասնավորապես պրոֆեսիոնալ կադրերի առումով. «Դրա վառ օրինակը ԱԺ–ի առաջին օրվա աշխատանքն է, երբ իշխանական դաշինքի բազմաթիվ պատգամավորներ բացահայտեցին, որ իրենք չեն տիրապետում իրավիճակին, և չեն հասկանում շատ նյուանսներ՝ կապված ԱԺ աշխատանքի հետ: Բացի այդ, պարզվեց, որ ԱԺ պատգամավորներից ոմանք նաև տարրական և պրիմիտիվ բաներ չգիտեն: Եվ հիմա, մեծ հաշվով, նման պատգամավորներից ինչ–որ բան ակնկալելը շատ բարդ է: Ում ասես՝ Ն. Փաշինյանն իր ուսերին «դրեց» ու բերեց ԱԺ, ու հիմա այդ մասսան, սխալներ գործելով, պետք է սովորի և դառնա պրոֆեսիոնալ: Բայց մենք չենք կարող այդ շռայլությունը մեզ թույլ տալ: Ես դժգոհ եմ ԱԺ որոշ պատգամավորների պրոֆեսիոնալիզմից: Իհարկե, սա չի վերաբերում բոլորին, բայց հիմնականում այդ խնդիրը կա»:
Նա շեշտեց՝ Նիկոլ Փաշինյանը ևս լավ գիտի, որ օրեցօր իր քաղաքական թիմի վարկանիշն անկում է ապրում:
«Իշխանության պատասխանատվությունը հասարակության առաջ շատ բարձր է: Բայց լինելով իշխանություն՝ այս 9 ամիսների ընթացքում որևիցե շոշափելի մեծ արդյունքների չեն հասել: Երևանի ավագանու ընտրություններին 82 տոկոս ձայն, մոտ երեք ամիս անց՝ ԱԺ արտահերթ ընտրություններին՝ շուրջ 70 տոկոս ձայն: Այսինքն՝ վարկանիշն արդեն նվազել էր: Եվ հիմա, հաշվի առնելով Փաշինյանի թիմակիցների ոչ պրոֆեսիոնալ գործելաոճը, այդ վարկանիշը կրկին նվազելու է: Եվ Նիկոլ Փաշինյանն արդեն խնդիր ունի, ըստ որի՝ պետք է պահպանի գոնե 50 տոկոսից ավելի վարկանիշը: Այդ վարկանիշը պահպանելու համար Փաշինյանի կառավարությանը անհրաժեշտ են կոնկրետ արդյունքներ: Արդյունքներ, որոնք թղթի վրա գրված չեն լինի և շոշափելի կլինեն հասարակության լայն շերտերի կողմից: Եվ եթե դա չհաջողվի ապահովել, և հասարակության լայն շերտերի մոտ տարբեր ոլորտներում դրական արդյունքների արձանագրում չլինի, ապա Ն. Փաշինյանի վարկանիշը բավականին մեծ անկում կունենա, որից էլ կօգտվեն ոչ միայն խորհրդարանական, այլև արտախորհրդարանական այն ուժերը, որոնք ուշիուշով հետևում են, և ամեն օր ուղղակիորեն վերլուծության են ենթարկում Փաշինյանի կառավարության գործունեությունը, նրա թիմակիցների ամեն մի քայլը»,–ընդգծեց Գ. Համբարյանը:
ԱՆՆԱ ԲԱԴԱԼՅԱՆ
