Տպել
1in.am-ը գրում է. «Այսօր հանրապետության նախագահի նստավայրում տեղի է ունենալու նորանշանակ նախարարների երդման արարողությունը։ 12 նախարարների երդման արարողությունը։ Թիվը չափազանց կարևոր է, քանի որ առաջին անգամ գործ ունենք կիսատ ձևավորված կառավարության հետ։ Այնպիսի կառավարության հետ, որի կազմում նշանակված նախարարներն աշխատելու են առանց այդ իսկ «Կառավարության կառուցվածքի մասին» օրենքի։ Առանց այն օրենքի, որը ոչ միայն հանրային, այլ անգամ խորհրդարանական քննարկման չի ներկայացվել։ Ահա այս պայմաններում այդ նախարարները երդվելու են ծառայել Հայաստանի Հանրապետությանը, որի կառավարության կառուցվածքը, ըստ էության, ապօրինի է կամ ոչ լեգիտիմ։ Իհարկե, կա գործող նախորդ օրենքը, բայց եթե իշխանությունն առաջնորդվեր «Կառավարության կառուցվածքի մասին» նախկին՝ դեռևս գործող օրենքով, ապա պետք է նշանակվեին բոլոր նախարարները։
Մինչդեռ մյուս 5 նախարարները չեն նշանակվել, ավելի ճիշտ՝ նրանք նշանակվել են փոխնախարարների պաշտոններում, որպեսզի հետագայում ձևավորվելիք կառավարության կազմում արդեն միավորված նոր գերատեսչությունների շրջանակներում համակարգեն իրենց ոլորտները։ Եվ ուրեմն, լայն իմաստով գործող կառավարությունն անօրինական է։ Ընդ որում, գործ ունենք աբսուրդային իրավիճակի հետ. իշխանությունն ինքը գերլեգիտիմ է, ստացել է ընտրողների ձայների ավելի քան 70 տոկոսը, բայց ահա այդ իշխանության ձևավորած կառավարությունը ոչ լեգիտիմ է տեխնիկական, բայց ոչ միայն տեխնիկական պատճառով։
Ոչ միայն տեխնիկական, քանի որ խնդիրը միայն ժամկետների մեջ տեղավորվելը չէ, ինչը չի հասցրել գործող իշխանությունը։ Խնդիրը շատ ավելի խորքային է և պայմանավորված է իշխանությունը կրողների մտածողությամբ, աշխարհայացքով։ Իշխանությունն իրացնելու համար անհրաժեշտ է համակարգային, կոմպլեքս մտածողություն, որի առկայության դեպքում՝ լինի կառավարության կառուցվածք, թե մեկ այլ կարևոր խնդիր, ամեն ինչ լուծվում է գործող ռազմավարության, հայեցակարգի շրջանակներում։ Հայաստանի գործող իշխանությունը իրականում, ոչ թե թղթի վրա, այլ իրականում չունի ո՛չ ռազմավարական, ո՛չ հայեցակարգային տեսլականներ։ Եվ հենց այդ պատճառով, խորհրդարանական ընտրություններից արդեն շուրջ երկու ամիս հետո էլ չունի հստակ պատկերացում կառավարության նոր կառուցվածքի վերաբերյալ։ Ռազմավարության բացակայության պատճառով ենք նաև ականատես լինում այն խայտառակ կադրային քաղաքականությանը, որը վարվում է գործող իշխանության կողմից՝ կադրերին ներկայացվող ոչ մի չափանիշ, ոչ մի չափորոշիչ, ընդամենը կամայական, տարերային նշանակումներ։ Դրա ականատեսն ենք մենք այսօր և լինելու ենք դրա ականատեսը նաև վաղը, քանի որ, ինչպես նշեցինք, իշխանությունը չունի զարգացման որևէ ռազմավարություն։
Ի դեպ, Դավոսից կազմակերպված իր «լայվում» Նիկոլ Փաշինյանը՝ անդրադառնալով կադրերի խնդրին, նշեց, որ ինքը մի շարք նախարարությունների ղեկավարումը առաջարկել է մասնավոր սեկտորից պրոֆեսիոնալ կադրերի, որոնք հրաժարվել են։ Փաշինյանի ակնարկն այն էր, որ հրաժարվել են այդ մարդիկ ցածր վարձատրության պատճառով։ Գուցե։ Բայց եթե դա անգամ այդպես է, ապա վարձատրությունը խնդրի ընդամենը մակերեսային կողմն է. եթե իշխանությունն ունենար զարգացման հստակ ռազմավարություն, հայեցակարգ, ինստիտուցիոնալ կառուցակարգեր, հավատացեք՝ տասնյակ պրոֆեսիոնալ կադրեր կհամաձայնեին իրենց գործող աշխատավարձերից տասնապատիկ անգամ ցածր վարձատրությամբ նախարար աշխատել՝ հանուն երկրին իրապես ծառայելու։ Այդ հրաժարված մարդկանց պրոֆեսիոնալիզմի մասին է խոսում նրանց հրաժարումը, հակառակ պարագայում, եթե նրանք լինեին կարիերիստներ կամ պատեհապաշտներ, վայրկյան իսկ չէին մտածի Փաշինյանի առաջարկը ընդունելու մասին»։
Ամբողջությամբ՝ սկզբնաղբյուր կայքում:
