Տպել
Ազգային ժողովում նիստը լուսաբանող լրագրողները փնտրում են «Լուսավոր Հայաստան» կուսակցության նախագահ Էդմոն Մարուքյանին ու չեն գտնում։ Բանը նրանում է, որ Է. Մարուքյանը մոտ երկու ժամ առաջ, այն պահին, երբ ԱԺ-ում կառավարության ծրագրի շուրջ ելույթ էր ունենում վարչապետ Նիկոլ Փաշինյանը, ֆեյսբուքյան իր էջում տեղադրել էր Պարույր Սևակի հանրահայտ բանաստեղծություններից մեկը՝ «Անկեղծ ասած այս ամենից ես հոգնել եմ»։ Որոշները նրա այս գրառման տակ ենթատեքստ են տեսնում, ու զարմանում, որ կառավարության ծրագրի այդ հույժ կարևոր քննարկման ընթացքում ԱԺ պատգամավորը կարող էր այնքան պարապ լիներ, որ նման գրառում կատարեր։
«Անկեղծ ասած՝ այս ամենից ես հոգնել եմ,
Ես, սիրելի՛ս, որ քեզ սիրել և օգնել եմ.
Ձեռք եմ պարզել, հույս եմ տվել,
Վատըդ թողած՝ լավըդ թվել,
Հավատացրել, հավատացել,
Թե իմ առաջ դուռ ես բացել՝
Չտեսնըված, չեղած մի դուռ։
Սակայն ի՞նչ եմ ես ստացել
Այդ ամենին ի տրիտուր»։
Օգտատերերն արդեն մեկնաբանություններում գրել են, թե ումի՞ց է հոգնել Մարուքյանը, այն էլ Նիկոլ Փաշինյանի ելույթի ժամանակ։ Պակաս ուշագրավ չէ նաև բանաստեղծության վերջին տունը․
«Անկեղծ ասած՝ զուր էր ամբողջ այս աղմուկը։
Անկեղծ ասած՝ նեղանում ես, թե լրջանում,
Մե՜կ է հիմա։
Էլ չեմ գցի ինձ սար ու ձոր,
Անկեղծ կասեմ՝ հեքիաթն ինչով է վերջանում.
Ցած է ընկնում երեք խնձոր
– Մեկ՝ ասողին,
Մեկ՝ լսողին,
Մեկ էլ… ինձ պես գիշեր ու զօր
Հիմարաբար սպասողին…
Անկեղծ ասած Անկեղծ ասած՝ այս ամենից ես հոգնել եմ,
Ես, սիրելի՛ս, որ քեզ սիրել և օգնել եմ.
Ձեռք եմ պարզել, հույս եմ տվել,
Վատըդ թողած՝ լավըդ թվել,
Հավատացրել, հավատացել,
Թե իմ առաջ դուռ ես բացել՝
Չտեսնըված, չեղած մի դուռ։
Սակայն ի՞նչ եմ ես ստացել
Այդ ամենին ի տրիտուր։
Անկեղծ ասած՝ ոչինչ չկա, և ոչ էլ կար։
Անկեղծ ասած՝ դու բնավ էլ ա՛յն չես եղել,
Ա՛յն չես եղել, ինչ որ ես եմ կարծել երկար։
Ո՞ւր ես, ասա՛, դու ինձ մղել։
Ճիշտ ճամփից ես միայն շեղել։
Սուտ խոստումով կապել ես ինձ,
Մանկան նման խաբել ես ինձ,
Ու չես տվել ոչի՜նչ, ոչի՜նչ։
Իսկ այն, ինչ որ ինձ ես տվել,
Արժանի չէր ո՛չ քեզ, ո՛չ ինձ։
Անկեղծ ասած՝ քո տվածից ես հոգնել եմ։
Ինքդ գիտես՝ որքան ձգտել ու տքնել եմ,
Որ դու … որ դու նման լինես իմ երազին։
Իսկ դու գիտե՞ս՝ ի՛նչ դուրս եկավ.
«Տղան հասավ իր մուրազին, Դուք էլ հասնեք ձեր մուրազին»։
Հեքիաթն, այո, միտքըս ընկավ…
Դու՝ հեքիաթում հրաշք աղջիկ,
Այնինչ կյանքում՝ ինչ-որ… չղջիկ,
Որ ոչ թռչուն, ոչ էլ մուկ է…
Անկեղծ ասած՝ զուր էր ամբողջ այս աղմուկը։
Անկեղծ ասած՝ նեղանում ես, թե լրջանում,
Մե՜կ է հիմա։ Էլ չեմ գցի ինձ սար ու ձոր,
Անկեղծ կասեմ՝ հեքիաթն ինչով է վերջանում.
Ցած է ընկնում երեք խնձոր
– Մեկ՝ ասողին, Մեկ՝ լսողին,
Մեկ էլ… ինձ պես գիշեր ու զօր Հիմարաբար սպասողին…
Անկեղծ ասած՝ հեքիաթներից ես հոգնել եմ…»:
Պարույր Սևակ
31.X.1955թ. Մոսկվա
