Տպել
Գարնանային դեպրեսիան տարածված երեւույթ է, սակայն տրամադրության անկման պատճառ կարող է լինել վիտամինների պակասը եւ թույլ իմունիտետը:
Փետրվարի 23-ին ասուլիսի ժամանակ թերապեւտ Լամարա Մանուկյանը նշեց, որ թուլությունը, քնկոտութունը եւ մռայլ տրամադրությունը կարող են առաջանալ սննդակարգում այնպիսի վիտամինների պակասից , ինչպիսիք են С, D եւ В վիտամինները:
«Ջերմոցային մրգերը եւ բանջարեղենները շատ հարուստ չեն վիտամիններով, հատկապես դա վերաբերում է վիտամին C-ին, որն օրգանիզմը պաշտպանում է ինֆեկցիաներից», -նշեց նա:
Սերոտոնինի՝ «երջանկության հորմոնի» արտադրման գործում կարեւոր դեր ունի վիտամին В-ն: Օրգանիզմում դրա պակասը հանգեցնում է տրամադրության տատանումներին եւ դեպրեսիայի զարգացմանը:
Ձմռանը ավելի քիչ արեւային օրեր են նկատվում, ինչն իր հերթին հանգեցնում է վիտամին D-ի պակասին: Դրա հետեւանքով առաջանում է քնկոտություն եւ թուլություն:
«Հաճախ մարդն անգամ չի կասկածում, որ տրամադրության տատանումները եւ դեպրեսիվ վիճակը կարող են առաջանալ օրգանիզմում վիտամինների եւ միկրոտարրերի պակասից», – նկատեց թերապեւտը:
Իրավիճակը կարող է շտկել գարնանային օրաբաժնում մեծ թվով մրգեր, բանջարեղեն եւ կանաչի ներառելը, արեւային եղանակին զբոսանքները, վիտամինների ընդունումը, որոնք ներառում են C եւ B խմբի վիտամիններ: Կարելի է նաեւ հավասար չափերով մեղրից, կիտրոնից եւ ընկույզից խառնուրդ ընդունել:
Մանուկյանը խորհուրդ տվեց նաեւ ըստ եղանակի հագնվել, քանի որ գարնանը օրվա ընթացքում ջերմաստիճանի տատանումների պայմաններում ՍՇՎ-ի զարգացման վտանգն ավելանում է: Բացի այդ մրսելու արդյունքում կարող է ցիստիտ զարգանալ:
Հաշվի առնելով այն, որ գարնանը կարող են սրվել քրոնիկ հիվանդությունները, Մանուկյանը քրոնիկ հիվանդություններ ունեցողներին խորհուրդ է տալիս դիմել բժշկի, ինչը կարող է օգնել ժամանակին պրոֆիլակտիկ միջոցներ ձեռնարկել:
