Տպել
«Բարգավաճ Հայաստան» կուսակցության անդամներն այսօր կուսակցության նախագահ Գագիկ Ծառուկյանի գլխավորությամբ այցելել են Մյասնիկյանի արձանի տարածք, ծաղիկներ են խոնարհել Մարտի 1-ի զոհերի հիշատակին։
«Մարտի 1-ը ցավ է բոլորի, ամբողջ հայ ժողովրդի համար»,- լրագրողների հետ զրույցում ասել է «Բարգավաճ Հայաստան» կուսակցության նախագահ Գագիկ Ծառուկյանը։
Հարցին՝ մարտի 1-ի բացահայտման ուղղությամբ կատարվող իրավական գործընթացները բավարարո՞ւմ են, Ծառուկյանը նշեց. «Դուք գիտեք, որ ամեն ինչ կատարվում է, բոլորը քննվում են ու, ասենք թե, շուտով կբացահայտվի, իրավապահ մարմինները լիարժեք կներկայացնեն եղելությունը: Էսօր որևիցե մեկը կարծիք, միտք ասելու իրավունք չունի, որովհետև դա միայն իրավապահ մարմինները լիարժեք կարող են, արդեն գործը հանձնած ա, կներկայացնեն հանրությանը, բոլորին պարզ կլինի»:
Հարցին՝ Ձեզ երբևէ հարցաքննե՞լ են վկայի կարգավիճակում, Ծառուկյանը զայրացավ. «Ի՞նչ վկա, անհարմար չես զգո՞ւմ, ինչքա՞ն կարելի ա բացատրել, ասել, որ դրա հետ Ծառուկյանը կապ չի ունեցել… Կամ դուք ձեզ դնում եք չհասկացողի տեղ… ես ձեր փոխարեն ամաչում եմ: Ինչի՞ համար հարցաքննեն, մարդը պետք է մի քիչ ուղեղ ունենա, հասկանա՝ ինչ հարց ա տալիս: Ծառուկյանը մաքուր ա, բյուրեղ ա, ու էս շանտաժները չի կարա Ծառուկյանի վրա ազդի»:
