Տպել
Աշխարհի ամենաթանկարժեք աշակերտը սովորում է Գեղարքունիքի մարզի Գեղաքար գյուղում։ Այս մասին այսօր ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նիստում հայտարարեց ԿԳ նախարար Արայիկ Հարությունյանը։
Նրա խոսքով`այս աշակերտի կրթությունն ապահովելու համար պետական բյուջեից ամեն տարի 19 մլն դրամ է ծախսվում։
«Ընդ որում, այս աշակերտին բերել են բոլորովին այլ մարզից, որպեսզի դպրոցը կարողանան պահել։ Մենք մարզպետի հետ քննարկում ենք այն հարցը, որ եթե այս աշակերտը մնալու է, մենք կարող ենք իր համար շքեղ ավտոմեքենա գնել, մի թանկարժեք վարորդ վարձել նրա համար, որ դա պետության վրա ավելի էժան նստի, քան այն,որ մենք հիմա ծախսում ենք»,– կես լուրջ– կես կատակ ասաց նախարարը` հավելելով, որ նա դպրոցի միակ աշակերտն է։
Գյուղական դպրոցներում աշակերտների փոքր թվով պայմանավորված, Արայիկ Հարությունյանի խոսքով, հաճախ երեխաները ստիպված են լինում սովորել միացված դասարաններում, օրինակ` նույն դասարանում սովորում են 5–րդ և 6-րդ դասարանցի մի քանի աշակերտ։
«Հիմա մենք պետք է համայնքների հետ աշխատենք, ծնողների հետ աշխատենք, որպեսզի կարողանանք մի գյուղի 6-րդ դասարանցիներին բերել մյուս գյուղի 6-րդ դասարան և լիարժեք դասարան ձևավորենք, իսկ 5-րդ դասարանցիներին տանենք այն գյուղի 5-րդ դասարան, որ նրանք լիարժեք կրթություն կարողանան ստանալ»,– ասաց նախարարը։
Այդուհանդերձ, Արայիկ Հարությունյանը շեշտեց, որ ՀՀ նոր կառավարությունն ի տարբերություն նախորդների, դեմ է դպրոցների օպտիմալացման ծրագրին։ «Մեր սկզբունքն է` յուրաքանչյուր դպրոցին առանձնահատուկ վերաբերմունք ունենանք»,– ասաց նախարարը։
Դպրոցների խնդիրների ուսումնասիրությունը նախարարությունը սկսել 2018թ.–ին։ Մի քանի դպրոցների մասին որոշումներ արդեն կայացվել են։ Այս տարի գործընթացը ևս շարունակվելու է` մինչև որ բոլոր դպրոցների խնդիրների լուծումը չգտնվի։
Գեղարքունիքի մարզի Գեղաքար գյուղի միջնակարգ դպրոցի միակ աշակերտը, Կրթական տեխնոլոգիաների ազգային կենտրոնի կայքում ներկայացված վիճակագրության համաձայն, 8-րդ դասարանցի Արայիկ Աթայանն է։
