Դատում են «հեղինակություն» Աշոտ Հարությունյանին գնդակահարող չեչեն քիլերին
Advertisement 1000 x 90

Դատում են «հեղինակություն» Աշոտ Հարությունյանին գնդակահարող չեչեն քիլերին

Սվերդլովի մարզային դատարանը սկսել է ուսումնասիրել  չեչեն Մովսուր Հասայեվի գործը, որը մեղադրվում է Եկատերինբուրգում քրեական  «հեղինակություն» Աշոտ Հարությունյանի սպանության մեջ: Այս մասին հաղորդում է Ura.ru-ն՝  հղումով դատարանի մամլո ծառայությունից ստացված տվյալներին:

Դատարանում հայտարարել էին, որ գործը ուսումնասիրելու են ատենակալները: Պրոցեսը վարելու է դատավոր Անդրեյ Մինեեվը: Առաջին նիստը՝ ապրիլի երկուսին:

Ատենակալներ պահանջել է ինքը՝ Հասայեվը, գործին ծանոթանալուց և փաստաբանի հետ խորհրդակցելուց հետո:  Այդ  ձևով  կասկածյալը ակնկալում է հասնել արդարացման. նրա շրջապատում նշում են, որ մարզային դատարանը սպանության համար մեղադրվողների արդարացման նախադեպ չի ունեցել, մինչդեռ՝  ատենակալներով դատավարությունների պատմության մեջ նման դեպքեր եղել են:

Փաստաբան Օլեգ Չիստյակովը  պնդում է, որ գործում չկա ոչ մի ապացույց, որ սպանության պահին  Հասայեվը եղել է քաղաքում:

«Նա ուներ հեռախոս, որով կապվում էր նաև Եկատերինբուրգի ծանոթների հետ, բայց  բիլինգի տվյալներով Հասայեվը չի եղել այն վայրերում, որտեղ վերջին անգամ գտնվել է տուժողը», — հայտարարել է փաստաբանը:

Նա նշում է նաև, որ Հասայեվն ունի ալիբի. սպանության օրը նա, իբրև, եղել է Չեչնյայում՝ հարազատի հուղարկավորության արարողությանը:  «Կան բազմաթիվ վկաներ, ովքեր հաստատել են դա», – ընդգծում է փաստաբանը: Մեղադրյալի  հարազատները նույնիսկ հանրային ակցիաներ են կազմակերպել  Մոսկվայում՝ ի սատարում  Հասայեվին:

Քննության վարկածով  2011թ-ի մայիսի  28-ին Հասայեվը կրակելով սպանել է Հարությունյանին Բելինսկի փողոցի վրա՝ շենքի բակում: Քիլերը մոտեցել է    «հեղինակությանը» թիկունքից և կրակել ծոծրակին: Դրանից հետո սկսել է կրակ արձակել  բիզնեսմենի թիկնապահների վրա:  Սկզբում համարում էին, որ սպանողը  Հարությունյանի ծանոթն է՝  ծագումով չեչեն Ռոման Յուսուպոբվը. նա ձերբակալված էր մեկ այլ գործով և առեղծվածային հանգամանքներում մահացել էր կալանավայրում: Հետո քննիչները ուշադրություն էին դարձրել մի լուսանկարի վրա, որտեղ պատկերված էր Յուսուպովը իր հայրենակիցների հետ՝ այդ թվում նաև Հասայեվի:
20182-ի հունվարին նրան ձերբակալել են Արգունում և բերման ենթարկել Եկատերինբուրգ:

Աղբյուր` Փաստինֆո