Տպել
Սոնա Շահգելդյանը նոր ֆոտոշարք է ներկայացրել, որում հարսի կերպարում է: Երգչուհին լուսանկարները տրամադրել է NEWS.am STYLE-ին, ինչպես նաև՝ պատմել, թե ինչու է որոշել ամուսնությունից տարիներ անց կրել երազանքների ճերմակ զգեստը.
«Թեման ինքս եմ մտածել, որովհետև չունեի հարսանեկան գեղեցիկ ֆոտոշարք: Հարսանիք արել ենք, բայց կոնկրետ հարսի զգեստ չեմ կրել, ու մեծ շուքով դա չի եղել. մեր ամուսնությունը եղել է համեստ ոճում, ու միշտ ցանկություն ունեի այսպիսի գեղեցիկ զգեստ կրելու»,-խոստովանում է նա՝ հավելելով.
«Կարծում եմ՝ ֆոտոշարքը գեղեցիկ է, կարևորը՝ անկեղծ, մաքուր ու պարզ… Իհարկե, կլինեն դեռ շատ ֆոտոշարքեր: Բացի այդ՝ շուտով նոր տեսահոլովակ կունենամ, որի ռեժիսորը Լուսինե Մարտիրոսյանն է: Նա Հայասանում իմ ամենասիրելի ռեժիսորն է՝ պրոֆեսիոնալ, տարիների փորձ ունեցող: Իհարկե, դա նաև նրանց ընտանեկան գեներից է: Մի խոսքով՝ սիրում եմ նրան ե´ւ որպես մարդ, ե´ւ որպես ռեժիսոր: Չեմ ցանկանում դեռ փակագծերը բացել, թե ինչպես է լինելու, բայց ասեմ, որ շատ տարբերվող երգ է: Մայիսի վերջին երևի աշխատանքը կհանձնեմ հանդիսատեսի դատին»:
Այսքանով, սակայն, Սոնայի նորությունները չեն սահմանափակվում: Նա բացահայտեց ևս մի քանի ծրագրեր.
Աշխատում եմ նոր երգերի վրա, որոնցից մեկը կլինի հենց հարսանեկան թեմայով: Այս գեղեցիկ ֆոտոշարքով երգը կներկայացվի YouTube-ի իմ ալիքում: Կան նաև այլ լեզուներով գրված երգեր: Դեռ չեմ ցանկանում նշել, թե որոնց հիման վրա կլինեն տեսահոլովակները: Ամեն տարի աշխատում եմ, չեմ դոփում նույն տեղում: Իրականում շատ դժվար է համատեղել ընտանիքն ու աշխատանքը, բայց դա ես սիրով եմ անում»:
Երգչուհին նաև մտածում է սեփական բիզնեսը հիմնելու մասին, որի առաջին մանրամասները վստահել է NEWS.am STYLE-ին.
«Քանի որ ինքս շատ խնջույքների եմ մասնակցում, շուտով կբացեմ իմ անվանկան կազմակերպությունը, որտեղ կընդունվեն հարսանեկան և այլ միջոցառումների պատվերներ, որոնց շուրջ կաշխատի մեծ խումբ: Դրա մասին ավելի ուշ կհայտարարվի սոցիական ցանցի իմ էջերում»:
