Կիմ Չեն Ինի և Դոնալդ Թրամփի բանակցությունների ձախողումից հետո Հյուսիսային Կորեայի պաշտոնյային գնդակահարել են

Հյուսիսային Կորեայի Պետական խորհրդի ԱՄՆ գծով հատուկ ներկայացուցիչ Կիմ Խեկ Չխոլին մահապատժի են ենթարկել Կիմ Չեն Ինի և Դոնալդ Թրամփի անհաջող բանակցություններից հետո: Այս մասին հայտնում է հարավկորեական Chosun Ilbo պարբերականը, համաձայն որի՝ Չխոլի հետ մահապատժի են ենթարկվել նաև ԱԳՆ ևս 4 աշխատակից: Պատճառը՝ նրանք չեն կարողացել համաձայնության գալ ԱՄՆ-ԿԴԺՀ 2-րդ գագաթնաժողովի ընթացքում:

Բացի այդ, աքսորվել է Կիմ Յեն Չխոլը՝ Հյուսիսային Կորեայի ղեկավարի առաջին տեղակալը:

Ինչպես հայտնում է ՌԻԱ-Նովոստին, այս լուրը պաշտոնապես անհնար է հաստատել:

Միևնույն ժամանակ, Chosun Ilbo-ն պարբերաբար հայտնել է պաշտոնատար անձանց մահապատժի ենթարկելու մասին, որն իր հերթին, չի համապատասխանել իրականությանը:

Նշենք, որ Հյուսիսային Կորեան հրաժարվել էր ԱՄՆ հետ վերսկսել ապամիջուկայնացման բանակցությունները:

Ս.թ. փետրվարի 27-28 Վիետնամի մայրաքաղաք Հանոյում տեղի է ունեցել Թրամփի և Ինի 2-րդ հանդիպումը, որը նախատեսվածից 2 ժամ շուտ է ավարտվել: Արդյունքում, կողմերը համաձայնության չեն եկել:

Առաջին գագաթնաժողովը տեղի է ունեցել 2018 թ. հունիսի 12-ին, Սինգապուրում: Կողմերը ձեռք էին բերել պայմանավորվածություններ, որոնց համաձայն Հյուսիսային Կորեան պատրաստակամություն էր հայտնել ապամիջուկայնացնել  իր զինանոցը, իսկ ԱՄՆ խոստացել էր Փհենյանին տրամադրել անվտանգային երաշխիքներ:

lenta.ru

Հրապարակման պատրաստեց Պողոս Վարժապետյանը