Տպել
Թուրքմենստանի նախագահ Գուրբանգուլի Բերդիմուհամեդովն իր ԳԱԶ-21 «Վոլգա» մեքենայով անձամբ է գնացել Աշխաբադ ժամանած ՌԴ վարչապետ Դմիտրի Մեդվեդևի հետևից՝ հյուրանոց, ինչից հետո բարձրաստիճան պաշտոնյաները մեքենայով զբոսնել են մայրաքաղաքով:
Ինչպես հայտնում է gazeta.ru-ն, զբոսանքը կարճատև է եղել: Այնուհետև Բերդիմուհամեդովն ու Մեդվեդևը գնացել են նախագահական նստավայր, որտեղ աշխատանքային նախաճաշ են ունեցել:
tass.ru-ն հավելում է, որ Թուրքմենստանի նախագահը բարձրաստիճան հյուրին ալաբայ ցեղատեսակի շան ձագ է նվիրել:
Հատկանշական է, որ կենդանին մոտեցել է Մեդվեդևին ու պառկել վարչապետի ոտքերի մոտ:
«Արդեն նոր տեր է գտել ու նրան ճանաչում է»,-անմիջապես նկատել է Բերդիմուհամեդովը:
Հավելենք, որ Մեդվեդևը Թուրքմենստան է ժամանել մայիսի 30-ին՝ ԱՊՀ երկրների կառավարությունների ղեկավարների խորհրդի նիստին մասնակցելու:
