Հակոբ Արշակյանը հանդիպում է ունեցել USAID-ում

ՀՀ բարձր տեխնոլոգիական արդյունաբերության նախարար Հակոբ Արշակյանը ԱՄՆ-ում ՀՀ արտակարգ և լիազոր դեսպան Վարուժան Ներսեսյանի մասնակցությամբ հանդիպում է  ունեցել USAID-ի ղեկավարի փոխտեղակալ Ալեքսանդր Սոկոլովսկու հետ:

Ինչպես հայտնեցին ՀՀ բարձր տեխնոլոգիաների արդյունաբերության նախարարությունից,  հանդիպմանը մասնակցում էին նաև USAID-ի գլոբալ լաբի փորձագետները:

Հանդիպման ընթացքում Հակոբ Արշակյանը ներկայացրել է նորաստեղծ նախարարության խնդիրներն ու ծրագրերը, Սիլիկոնյան հովիտ կատարած այցի և գործնական հանդիպումների մանրամասները։ Նախարարն անդրադարձել է նաև Երևանի Պոլիտեխնիկական համալսարանում ներդրված Հայկական ազգային ինժեներական լաբորատորիաների հաջողված փորձին, լաբորատորիաների զարգացման պլաններին և արտերկրում նման փորձի կիրառման հեռանկարին։

Ալեքսանդր Սոկոլովսկին Հայաստանում բարձր տեխնոլոգիաների ոլորտի առաջընթացի վերաբերյալ իր տպավորություններով կիսվել է ներկաների հետ: Նա ընդգծել է, որ USAID-ի համագործակցությունը Հայաստանի հետ այս ոլորտում հաջողված է այն առումով, որ արդարացվել է USAID-ի ռազմավարությունը` ներդրումներ կատարել ցածր եկամուտ ունեցող, սակայն զարգացման հսկայական ներուժ ունեցող երկրներում:

Նախարարը ևս իր գոհունակությունն է հայտնել USAID-ի հետ համագործակցությամբ Երևանի ազգային պոլիտեխնիկական համալսարանում Լաբի ներդրման ու հետագա արդյունավետ գործարկման առնչությամբ` ընդգծելով ՀՀ գիտական, տեխնոլոգիական և կրթական  ներուժի առկայությունը որպես հաջողության հիմնական գրավական։

Կողմերը քննարկել են համագործակցության այնպիսի հնարավորություններ, ինչպիսիք են ստարտափերի համար մարքեթինգի վերաբերյալ համապատասխան դասընթացների կազմակերպումը, Պոլիտեխնիկական համալսարանում ԱՄՆ առաջատար համալսարանների կրթական ծրագրերի ներդրումը, ազգային վենչուրային ֆոնդի ֆինանսավորումը, թվային տնտեսության, կիբերանվտանգության ուղղությամբ հնարավոր համագործակցության ուղղությունները։