Տպել
24 տարի Պետական համալսարանի Իջևանի մասնաճյուղի ֆիզիկայի ֆակուլտետում աշխատելուց հետո Անահիտ Ալավերդյանը որոշեց իր փոքրիկ ընտանեկան բիզնեսը հիմնել։ Հյուրատունը բացելիս որոշեցին շեշտը դնել ջերմ ընտանեկան մթնոլորտի վրա, որտեղ կարելի է համտեսել տիկին Անահիտի պատրաստած ուտեստները, վայելել գեղեցիկ այգին, ինչպես նաև մասնակցել տեղական ուտեստների պատրաստման և կարպետագործության դասընթացների։
«Այցելուների թիվը տարեցտարի աճում է և այսօր արդեն ծրագրում ենք ընդլայնել բիզնեսը»,- ասում է նա։ Զբոսաշրջիկների, ինչպես նաև հյուրանոցների ամրագրման հայտնի հարթակների հետ կապը ապահովում է տիկին Անահիտի հարսը՝ Աննա Մարդանյանը, ով մի քանի օտար լեզվի է տիրապետում։
Տիկին Անահիտն իր ղեկավարած հասարակական կազմակերպության միջոցով փորձում է նաև օգնել տարածաշրջանի խոցելի խմբերի կանանց ծավալել ձեռնարկատիրական գործունեություն։
