Տպել
«Կանչ», «Ծիծեռնակ» և «Աղբյուր» մանկապատանեկան պարբերականները կանգնած են փակվելու վտանգի առաջ, քանի որ պետությունը դադարեցրել է բյուջեից դրանց ֆինանսավորումը: Այս մասին Sputnik Արմենիայի հետ զրույցում ասում է «Կանչ» թերթի գլխավոր խմբագիր Վարուժան Մնացականյանը։
«Այս տարի ոչ մի կոպեկ մենք չենք ստացել, այն հաշիվը, որով մենք ֆինանսավորվում էինք, չգիտես ինչու, հանված է։ Փաստորեն, մենք դատապարտված ենք փակվելու, քանի որ մեր ֆինանսավորման միակ աղբյուրը պետական բյուջեն էր»,-նշում է Մնացականյանը։
Նրա խոսքով`անցյալ աշնանն իրենք հանդիպել են կրթության ու գիտության նախարար Արայիկ Հարությունյանի հետ, բարձրաձայնել իրենց խնդիրները։
«Հարությունյանն ասաց, որ պետական ֆինանսավորումը պետք է տրվի ոչ թե յուրաքանչյուր հրատարակչությանն առանձին, այլ պետք է հայտարարվի մրցույթ։ Այն պարբերականը, որը կկարողանա ամենաքիչ գումարով շարունակել տպվել, առաջնահերթությունը կտրվի դրան»,-պատմում է «Կանչ» թերթի գլխավոր խմբագիրը։
Մրցույթն անցկացվել է միայն ամսագրերի համար, հետևաբար «Կանչ» թերթը դուրս է մնացել հետագա պետական ֆինանսավորման հնարավորությունից։
«Դիմել ենք վարչապետին, Ազգային ժողովին, հանրապետության նախագահին, սպասում ենք պատասխանների, սակայն դեռ արձագանք չկա»,- ասում է Վարուժան Մնացականյանը։
«Կանչ» թերթի գլխավոր խմբագիրն արձանագրում է, որ մանկապատանեկան «Կանչ» թերթը, «Աղբյուր» ու «Ծիծեռնակ ամսագրերը պետական հոգածության են անցել դեռևս 1990 թվականին, այն ժամանակվա իշխանությունների որոշմամբ։
