Տպել
SHAMSHYAN․com-ի տեղեկություններով՝ երեկ, հուլիսի 8-ին Ոստիկանության Մասիսի բաժնի քրեական հետախուզության և համայնքային ոստիկանության բաժանմունքների ծառայողները, համագործակցելով Ոստիկանության պետական պահպանության գլխավոր վարչության Արտաշատի բաժնի Ոստիկանության Մասիսի դասակի իրենց գործընկերների հետ, Ոստիկանության Մասիսի բաժին են բերման ենթարկել Երևանի բնակիչ 29-ամյա Հակոբ Դ․-ին։
Ինչպես հայտնում է ֆոտոլրագրող Գագիկ Շամշյանը, վերջինս կասկածվում է Մասիս քաղաքի «Նոյան» հարսանյաց հանդիսությունների սրահի բակում խուլիգանություն կատարելու մեջ։
Գ․ Շամշյանի տեղեկություններով՝ Հակոբ Դ․-ն իրեն պատկանող մեկ փողանի ողորկափող որսորդական հրացանից մի քանի անգամ կրակոցներ է արձակել հանդիսություների սրահի բակում։ Նա եղել է Toyota Camry մակնիշի 88 SZ 880 համարանիշի ավտոմեքենայով։ Եվ հրացանը եղել է ավտոմեքենայի մեջ։
Ֆոտոլրագրողի տեղեկություններով՝ ավտոմեքենան նույնպես տեղափոխվել է Ոստիկանության Մասիսի բաժնի հատուկ պահպանվող տարածք։
Գ․ Շամշյանի տեղեկություններով՝ փաստի առթիվ Ոստիկանության Մասիսի բաժնի հետաքննչական բաժանմունքում նյութեր են նախապատրաստվում։ Հրացանը հետաքննիչի որոշմամբ ուղարկվել է փորձաքննության։
Ֆոտոլրագրողի տեղեկություններով՝ Հակոբ Դ․-ն ոստիկաններին հայտնել է, որ ինքն աշխատում է «Մետաքս գոլդ» ՍՊԸ-ում՝ որպես անվտանգության պետ։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
