Տպել
Նիկոլ Փաշինյանն այսօր մի քանի որոշումներ է ստորագրել, համաձայն որոնց՝ աշխատանքից ազատվել են ՀՀ վարչապետի գլխավոր խորհրդականներ Արամ Ղարիբյանն ու Արսեն Գասպարյանը, ՀՀ վարչապետի օգնական Մհեր Սահակյանը։
Պատճառների մասին տեղեկություն ստանալու համար 24News-ը կապ հաստատեց ՀՀ վարչապետի մամուլի խոսնակ Վլադիմիր Կարապետյանի հետ։
«Տեղեկություն չունեմ, փորձեմ ճշտել։ Մի երկու ժամից զանգահարեք», – ասաց վարչապետի մամուլի խոսնակը։
Նշենք, որ աշխատանքից ազատված գլխավոր խորհրդականներից Արամ Ղարիբյանը 2008-2011 թվականներին աշխատել է ՀՀ վարչապետ Տիգրան Սարգսյանի գլխավոր խորհրդական, 2011-2018 թվականներին՝ ՀՀ նախագահ Սերժ Սարգսյանի գլխավոր խորհրդական, իսկ 2018 թվականի հունիսի 8-ից նշանակվել էր նաև Նիկոլ Փաշինյանի գլխավոր խորհրդական։
Աշխատանքից ազատված մյուս պաշտոնյան՝ Արսեն Գասպարյանը ևս պետական կառավարման երկարամյա փորձ ուներ։ 1991-1996 թվականներին աշխատել է ՀՀ ԱԳՆ-ում։ 1992–1997-ին Լեռնային Ղարաբաղի հակամարտության խաղաղ կարգավորման բանակցությունների ժամանակ ՀՀ պատվիրակության անդամ է եղել, 1996-1998-ին՝ ՀՀ ԱԳՆ խոսնակ, 1998-1999-ին՝ Վիեննայում տեղակայված միջազգային կազմակերպություններում ՀՀ մշտական ներկայացուցչության ղեկավարի տեղակալ։ 2018-ի հուլիսի 30-ին նշանակվել էր ՀՀ վարչապետի գլխավոր խորհրդական։
