Տպել
Խմելու համար նախատեսված հակաբիոտիկները կարող են մեծացնել աղիքների ուռուցքների որոշ տեսակների զարգացման հավանականությունը: Այսպիսի եզրակացություն են կատարել Ջոնս Հոփքինսի համալսարանին առընթեր Բժշկության դպրոցի գիտնականները:
Հետազոտության համաձայն, որը ներառել է Մեծ Բրիտանիայի ավելի քան 166 հազար բնակիչների մասին տվյալները, աղիների քաղցկեղի զարգացման հավանականությունը մեծացել է նույնիսկ հակաբիոտիկների նվազագույն ընդունման դեպքում և առավելագույնի է հասել հակաանաէրոբ ակտիվությամբ օժտված դեղեր ընդունելիս. օրինակ՝ պենիցիլինային խումբը ավելի հաստատուն էր կապված աղիների քաղցկեղի մեծ հավանականության հետ:
Մյուս կողմից, հետազոտության համաձայն՝ հակաբիոտիկների ընդունումը մի փոքր նվազեցրել է ուղիղ աղիի քաղցկեղի հավանականությունը:
Հետազոտության հեղինակներն ընդգծում են, որ այս հետազոտությունը ցույց է տալիս միայն համահարաբերակցությունը, բայց չի ապացուցում խմելու համար նախատեսված հակաբիոտիկների և աղիների քաղցկեղի միջև պատճառահետևանքային կապը:
Հետազոտողները պացիենտներին, որոնց բժիշկը հակաբիոտիկ է նշանակել, համառորեն խորհուրդ են տալիս ոչ մի դեպքում բուժումից չհրաժարվել և այն չընդհատել: Բայց չի կարելի հակաբիոտիկներ ընդունել առանց լուրջ անհրաժեշտության և առանց բժշկի նշանակման:
Նշենք, որ մեկ ուրիշ հետազոտություն ցույց է տվել, որ աղիների քաղցկեղից պաշտպանվելու համար անհրաժեշտ է ամբողջ կյանքի ընթացքում ֆիզիկապես ակտիվ լինել:
