Տպել
Ռուսաստանի խոշորագույն ընկերություններից մեկի` «ՌԵՍՈ–Գարանտիա» ապահովագրական ընկերության սեփականատերեր Սերգեյ և Նիկոլայ Սարկիսովները, Ռուսաստանի ամենահարուստ կլանների ցուցակում զբաղեցրել են 8-րդ հորիզոնականը։
Այս մասին գրված է Forbes ամսագրի վարկանշային աղյուսակում։
Forbes–ը կազմել է ամենահաջողակ գործարարական տոհմերի՝ թվով 6-րդ վարկանիշային աղյուսակը: Մեկ տարվա ընթացքում այն մեկ երրորդով փոփոխվել է։ Սարկիսովների կարողությունը 1.6 մլրդ դոլար է գնահատվել։
Սերգեյ Սարկիսովը 60 տարեկան է, նա ՌԵՍՈ խմբի համասեփականատեր է։ Ամուսնացած է, ունի 5 երեխա, բնակվում է Մոնակոյում։ Նրա եղբայր Նիկոլայ Սարկիսովը նույնպես ՌԵՍՈ խմբի համասեփականատեր է։ Նա 51 տարեկան է, ամուսնացած է, ունի 8 երեխա, ապրում է Լիոնում։
Սարկիսովներին է պատկանում «ՌԵՍՈ–Գարանտիա» ընկերության բաժնետոմսերի 60,6%–ը, 36,7%–ը պատկանում է աշխարհում խոշորագույն AXA ֆրանսիական ապահովագրական և ներդրումային խմբին։ Սարկիսովներն ունեն 115 հա հողատարածք Մոնակոյում, 3 տուն Լոս Անջելեսում, առանձնատուն Լոնդոնում, դղյակ Ֆրանսիայում և այլն։
2018 թվականին եղբայրներին խարդախության մեջ է մեղադրել ուկրաինացի գործարար Լև Խլյավիչը։ Նրա խոսքով` 2008 թվականին իրենք նրանից գնել են «Ուկրինմեդստրախի» 33% –ը։ Սակայն 2019 թվականի հուլիսին գործը փակվել է հանցակազմի բացակայության պատճառով։
Սերգեյ Սարկիսովի ավագ որդի Նիկոլայը, որը ռեժիսոր է, հոր հետ համատեղ հանդիսանում է Blitz Production պրոդյուսերական ընկերության սեփականատեր ԱՄՆ–ում։ Սերգեյ Սարկիսովը կինոարտադրությամբ է զբաղվում ոչ միայն Ամերիկայում, այլև Ռուսաստանում։
Ավելի մանրամասն՝ armeniasputnik.am
