Տպել
Ամերիկյան Keeping Up With the Kardashians իրապատում շոուի աստղ Քիմ Քարդաշյանը հայտնել է, որ ԱՄՆ նախագահ Դոնալդ Թրամփի հետ քրեական արդարադատության բարեփոխումների ուղղությամբ համագործակցելու որոշումը կայացնելուց առաջ քաջ գիտակցել է իր հասցեին սպասվող «քննադատությունների» մասին, սակայն չի վախենում իր հեղինակությունը կորցնելուց:
ABC-ի եթերով հեռարձակվող The View հաղորդման շրջանակում 38-ամյա հայուհին իր կարծիքն է հայտնել իր հասցեին հնչող քննադատությունների վերաբերյալ:
«Անշուշտ, ես հստակ գիտակցում էի (հնարավոր քննադատությունը): Բայց ինձ համար միշտ առաջնային են եղել մարդկանց խնդիրները, ոչ թե քաղաքականությունը»,- հայտնել է Քիմը և ընդգծել, որ եթե հաշվի առներ մարդկանց՝ Թրամփի մասին կարծիքները և նրան չդիմեր Ալիս Ջոնսոնի արդարացման խնդրանքով, դա նրա կողմից եսակենտրոն արարք կլիներ, քանի որ դրանով նա ցույց կտար, որ ավելի շատ մտահոգված է իր հեղինակությամբ, ոչ թե մարդկային կյանքերով:
63-ամյա Ալիս Ջոնսոնը դատապարտված է եղել ցմահ ազատազրկման՝ առանց պայմանական վաղաժամկետ ազատման հնարավորության։ Նա մեղադրվում էր թմրանյութերի ու փողերի լվացման համար: Քիմ Քրադաշյանը, ուսումնասիրելով վերջինիս գործը, 2018 թվականի մայիսին դիմել է Թրամփին՝ նրան ազատ արձակելու խնդրանքով, ինչն ԱՄՆ նախագահը շաբաթներ անց բավարարել էր:
