«Մեր ազգային անվտանգությունը մեկ կուսակցության վստահելը, Ազգային անվտանգության ծառայությունը կուսակցականների որջ դարձնելը, իրականում, ազգային անվտանգությանը սպառնացող վտանգ է»

Կարինե Հակոբյանը ֆեյսբուքյան իր էջում գրում է. «Ազգային անվտանգության ծառայության ղեկավարի պաշտոնը քաղաքական, այսինքն կուսակցական դարձնելու օրենքի նախագիծը ի չիք է դարձնում հայկական պետականություն ունենալու մեր բոլոր հույսերը: Այն ներկայացրել է «Լուսավոր Հայաստան» կուսակցությունը՝ «Իմ քայլ»-ի հետ համաձայնեցրած, կամ գուցե առաջարկով, և, բնականաբար, առաջին ընթերցմամբ այն շռնդալից հաջողությամբ անցել է:

Մի քանի փաստարկ բերեմ, թե ինչու չի կարելի, որ Ազգային անվտանգությամբ ուղղակորեն զբաղվող պետական կառույցը՝ որը Հայաստանում Ազգային անվտանգության ծառայությունն է, լինի կուսակցական կամ, որը նույնն է՝ քաղաքական: Որովհետև, միշտ հնարավոր է, որ իշխանության եկած կուսակցությունն, ի վերջո, չսպասարկի ազգային շահերը և այդ դեպքում Ազգային անվտանգության ծառայության անկուսակցական բնույթը երկրի կայունության և անվտանգության երաշխիքն է:

Հայեցակարգերի մշակման կամ ղեկավարման մակարդակում ԱԱԾ-ն բնականաբար, հիմնված պետք է լինի ազգային գաղափարախոսության և ազգային շահերի վրա, իսկ կատարման մակարդակում այն պետք է լինի չափազանց պրոֆեսիոնալ: Առաջին դեպքում գործ ունենք «ազգային»-ի և «կուսակցական»-ի տարբերության, հնարավոր է նաև հակասության հետ, իսկ երկրորդ դեպքում, վստահաբար կարելի է ասել, որ կուսակցությունների ներուժով սահմանափակվելը չափազանց սխալ է:

Մեր ազգային անվտանգությունը մեկ կուսակցության վստահելը, Ազգային անվտանգության ծառայությունը կուսակցականների որջ դարձնելը, իրականում, ազգային անվտանգությանը սպառնացող վտանգ է: Եթե Ազգային ժողովը զբաղված է դրանով, թող օր առաջ հայտարարի դրա մասին:

Հ.Գ. Իշխող կուսակցությունը հինգը տարին մեկ փոխվում է, իսկ գաղտնի հետախուզական ցանցը մնում է; Պատկերացնում եք, չէ՞, ինչ անհեթեթ օրենք է առաջին ընթերցմամբ անցել»:

https://www.facebook.com/krhakobyan/posts/2949500161743579