Տպել
Այսօր երեկոյան Իսպանիայի մայրաքաղաքում տեղի կունենա մադրիդյան դերբին՝ «Ատլետիկոյի» և «Ռեալի» միջև: Այս թիմերի միջև սկզբունքային դիմակայությունն ունի հարուստ պատմություն՝ իր վիճակագրությամբ, թվերով և փաստերով, որոնցից կներկայացնենք մի քանիսը:
«Ռեալն» ու «Ատլետիկոն» 273 անգամ պաշտոնական խաղերի շրջանակներում հանդիպել են միմյանց, որոնցում «Ռեալը» հաղթել է 139 անգամ, «Ատլետիկոն»՝ 69, իսկ 65 խաղում գրանցվել է ոչ-ոքի:
Մադրիդյան դերբիների ընթացքում խփվել է 816 գոլ՝ 468-ը «Ռեալի» կատարմամբ, իսկ 348-ը՝ «Ատլետիկոյի»:
Իսպանական ֆուտբոլի պատմության մեջ «Ռեալի» ու «Ատլետիկոյի» միջև դիմակայությունն ամենաշատ կրկնվածն է՝ գերազանցելով կատալոնական դերբիին (261):
«Ատլետիկոյի» հարկի տակ տեղի է ունեցել 133 դերբի, որոնցում առավելությունը ևս «Ռեալի» կողմն է. «Արքայական ակումբը» տարել է 57 հաղթանակ՝ «ատլետների» 42-ի դիմաց:
Այս դիմակայության պատմության լավագույն ռմբարկուն Կրիշտիանու Ռոնալդուն է՝ խփած 22 գոլով: Նրան հաջորդում են Դի Ստեֆանոն (17), Սանտիլյանան (15), Պուշկաշը (13), Բուտրագենյոն (12), Բեռնաբեուն (12), Կամպոսը (12), Էսկուդերոն (11) և Ռաուլը (11):
Լա լիգայի վերջին 15 մադրիդյան դերբիներում «Ռեալին» հաջողվել է հաղթել «Ատլետիկոյին» ընդամենը 2 անգամ: Մնացած 5 դեպքերում հաղթել է «Ատլետիկոն», իսկ 8 խաղում գրանցվել է ոչ-ոքի:
Այդուհանդերձ, «Ատլետիկոյի» դաշտում «Ռեալը» վերջին 18 այցելությունների ժամանակ պարտվել է միայն մեկ անգամ՝ 2015 թվականին, 0-4 հաշվով:
Դիեգո Սիմեոնեն «Ռեալի» դեմ հանդիպումների քանակով կհավասարվի Լուիս Արագոնեսին, որը 30 պաշտոնական խաղ է անցկացրել «Ատլետիկոյի» ղեկին «սերուցքայինների» դեմ: Երկու մարզիչներն այս պահին հաղթանակների քանակով ևս հավասար են՝ 9, բայց Սիմեոնեն հաղթելու դեպքում կդառնա «Ռեալի» հանդեպ ամենաշատ հաղթանակ տարած «Ատլետիկոյի» գլխավոր մարզիչը:
Տիբո Կուրտուան 2018 թվականի դեկտեմբերից սկսած 2 խաղ անընդմեջ չի կարողացել սեփական դարպասն անառիկ պահել: Եթե այսօր բելգիացին գոլ չընդունի, կկարողանա 2-րդ չոր խաղն անցկացնել, քանի որ «Սևիլյայի» դեմ նա ևս գնդակը չհանեց իր դարպասից:
Կարիմ Բենզեման ֆանտաստիկ մարզավիճակով է մոտենում դերբիին՝ Լա լիգայում անցկացրած 5 խաղում խփելով նույնքան գնդակ, բայց ֆրանսիացին սարսափելի վիճակագրություն ունի «Ատլետիկոյի» դեմ. 32 պաշտոնական խաղ, խփած ընդամենը 4 գոլ:
