Տպել
Ռուսաստանցի հումորիստ Եվգենի Պետրոսյանը մտադիր է գրական հայերեն սովորել, թեև տիրապետում է բարբառներից մեկին և հասկանում է մայրենի լեզվի 90 տոկոսը։ Այդ մասին նա պատմեց այսօր Երևանում կայացած մամուլի ասուլիսի ընթացքում։
Պետրոսյանը ծնվել է Բաքվում։ Միջնակարգ դպրոցն ավարտելուց հետո 1961թ.-ին նա տեղափոխվել է Մոսկվա` երազելով դառնալ դերասան։ Ավարտել է Էստրադային արվեստի համառուսական ստեղծագործական արվեստանոցը։
«Երիտասարդ տարիքում խոսել եմ հայերեն, բայց Բաքվի բարբառով, որը տարբերվում է երևանյանից», – ասաց հումորիստը։
Լրագրողները խնդրեցին հայերեն ինչ–որ բան ասել, հումորիստը կատակեց. «Ի՞նչ ես ուզում»։
Նա պատմեց, որ երիտասարդ տարիքում նպատակ է դրել կատարելապես տիրապետել ռուսերենին և «ճանապարհին» հայերենը քիչ–քիչ մոռացության է մատնվել։ Այսօր արտիստն ուզում է վերականգնել մայրենի լեզվի իմացությունը։
«Ինձ հայրս սովորեցրել է լինել գրագետ, և ես վախենում եմ ինչ–որ անգրագետ բան ասել։ Ուստի խոսելիս երբեմն հայերեն բառեր եմ ասում, բայց շատ զգույշ», – պատմեց Պետրոսյանը։
Արտիստը խոստովանեց, որ իրեն շատ է դուր գալիս հայկական հումորը` խայթող, խորը և անակնկալներով լի։ Պետրոսյանը նշեց, որ բազմիցս հանդիպել է «Comedy club»–ի ներկայացուցիչների հետ և խորհուրդ տվել չօգտագործել վիրավորական արտահայտություններ, քանի որ դա, նրա համոզմամբ, «չի մտնում հայերի մտածողության, մշակույթի և աշխարհայացքի մեջ»։ Պետրոսյանը համոզված է, որ հայկական հումորին խորություն են հաղորդում «թախիծի նոտաները»։
«Մեր ժողովրդի բարդ ճակատագիրը ստիպում է գնահատել հումորը», – նշեց նա։
Հումորիստը մի պատմություն պատմեց. մի անգամ խնջույքի ժամանակ ներկաներից մեկը տխուր հայկական երգ է երգել։ Մյուս հյուրը խնդրել է ինչ–որ ուրախ բան երգել, բայց Պետրոսյանը միջամտել է և թույլ չի տվել` հայտարարելով, որ այդ թախիծը երաժշտության և ժողովրդի հումորի մեջ ներթափանցել է անցած դաժան ճանապարհի պատճառով։
«Ես հաճախ փորձել եմ գրքեր կարդալ Ցեղասպանության մասին, բայց չեմ ավարտել, քանի որ սիրտս ցավել է և լաց եմ եղել։ Ամբողջ աշխարհը պետք է հիշի դա` որպես նախազգուշացում այն մասին, թե ինչ աստիճանի կարող է հասնել չարագործությունը», – ընդգծեց հումորիստը։
Նշենք, որ Եվգենի Պետրոսյանը Հայաստան է ժամանել նոյեմբերի 20–ին։ Նա արդեն հասցրել է փոքր համերգ տալ, բայց նոյեմբերի 24–ին ելույթ կունենա մեծ մենահամերգով։ Պատմական հայրենիք այցի ընթացքում Պետրոսյանն այցելել է Հայոց ցեղասպանության թանգարան։ Նա մտադիր է այցելել նաև Խոր Վիրապ։
