Տպել
Կյանքի 82-րդ տարում վախճանվել է բանաստեղծ, թարգմանիչ, ՀՀ մշակույթի վաստակավոր գործիչ Յուրի Սահակյանը։
Այս մասին «Ֆեյսբուք»-ի իր էջում տեղեկացրել է Հայաստանի գրողների միության նախագահ Էդվարդ Միլիտոնյանը:
«Վաստակաշատ գրողի, մանուկների և բոլոր ընթերցողների սիրելի բանաստեղծի ու բարեկամի, հրաշալի գործընկերոջ և մարդու հիշատակը միշտ վառ կմնա նրան ճանաչողների ու մտերիմների սրտերում»,- գրել է Միլիտոնյանը:
Գրականագետ Արքմենիկ Նիկողոսյանն էլ «Ֆեյսբուք»-ի իր էջում նշել է, որ, երբ ուսումնասիրել է 1960-ականներին ասպարեզ իջած բանաստեղծների գործերը, սկզբում իրեն ամենաշատը հենց Յուրի Սահակյանն է տպավորել, հատկապես՝ «Իմ դիմանկարը» բանաստեղծությունը: Նիկողոսյանը սոցիալական ցանցում մի հատված է տեղադրել վերոնշյալ բանաստեղծությունից.
երիտասարդ,
միջակից բարձր հասակով,
20-րդ դարի ֆոնի վրա,
աչքերում վիշտը 41 թվի
և հրճվանքը տիեզերական վաղվա:
ում հայրերը չծերացան
տանը, առօրյա հոգսերի մեջ:
ով բոլոր գրքերը կարդաց
պատերազմի մասին՝
հայրերին գտնելու հույսով
ու հասկացավ, որ գրքերը հորինված են:
Հարկավոր էր նրանց փնտրել կյանքում:
Ու գնաց հայրերի հետքերով:
Քաղաքացիական հոգեհանգիստը տեղի կունենա նոյեմբերի 26-ին, ժամը 18-ից, «Սան Լազարոս» սգո սրահում (հասցեն՝ Լուկաշին 152, Շահումյանի գերեզմանատան հարևանությամբ), հուղարկավորությունը՝ նույն հասցեից, նոյեմբերի 27-ին, ժամը 13:00-ին։
Յուրի Սահակյանը ծնվել է 1937 թվականին Լեռնային Ղարաբաղի Մարտակերտի շրջանի Չայլու գյուղում։ Ավարտել է Երևանի պետական համալսարանի բանասիրական ֆակուլտետը: Մասնակցել է Մոսկվայի Մ. Գորկու անվան գրականության ինստիտուտին կից բարձրագույն գրական դասընթացներին։ Աշխատել է Երևանի հեռուստատեսության ստուդիայում, «Հայրենիքի ձայն» շաբաթաթերթում, Հայաստանի գրքասերների ընկերությունում, «Սովետական գրող» և «Արևիկ» հրատարակչություններում։
Յուրի Սահակյանը հեղինակ է երեք տասնյակից ավելի բանաստեղծական ժողովածուների (մեծ մասը՝ գրված մանուկների համար)։ Նրա բանաստեղծությունների հիման վրա գրվել են բազմաթիվ երգեր։
Ընթերցողների կողմից սիրված բանաստեղծությունների ու երգերի համար Յուրի Սահակյանն արժանացել է ՀՀ մշակույթի վաստակավոր գործչի և Արցախի Հանրապետության մշակույթի և արվեստի վաստակավոր գործչի կոչումների, «Ոսկե եղեգ» պետական գրական առաջին կարգի մրցանակի, «Մովսես Խորենացի» մեդալի։
