Տպել
ՀՀ կառավարության` այսօր ընթացող տարեվերջյան նիստը բավական դրական մթնոլորտում անցավ, քանի որ կառավարության անդամների մոտ տոնական տրամադրություն էր։ Մինչև բուն նիստը կսկսվեր, Ամանորի թեմային անդրադարձան ինչպես նախարարները, այնպես էլ վարչապետ Նիկոլ Փաշինյանը։ Sputnik Արմենիան հետևել է նիստին ու առանձնացրել առավել հետաքրքրաշարժ դրվագները։
Արայիկ Հարությունյանը թատրոն հրավիրեց բոլորին
2020–ի հունվարի 1–ին կառավարության բոլոր անդամները ներկայացման կգնան. ՀՀ կրթության, գիտության, մշակույթի և սպորտի նախարար Արայիկ Հարությունյանը կառավարության նիստի ժամանակ գործընկերներին ներկայացման տոմսեր նվիրեց։
«Բոլորին նվիրում եմ Սունդուկյանի թատրոնի «Թռիչք կկվի բնի վրայով» ներկայացման տոմս։ Ի դեպ, ոչ թե հրավիրատոմսեր են, այլ տոմսեր»,–ասաց նախարարը։
ՀՀ վարչապետը արձագանքեց, թե Հարությունյանի բախտը բերել է` նախարարությունների թիվը կրճատվել է։
Երբ տոլմա ուտել և երբ է այն ժամկետն անց արդեն
Մինչև նիստը կմեկնարկեր, Փաշինյանը կոչով դիմեց ՀՀ քաղաքացիներին` մարդկանց ուտելու կարողությունները սահմանափակ են, տանտիրուհիներին պետք չէ չարչարել։ Նա նշեց նաև, որ Ամանորի տոնակատարություններն այնպես են կազմակերպել, որ մարդիկ տներից դուրս գան ու միասին նշեն տոնական օրերը։
«Ուզում ենք, որ տնային տնտեսուհիները դեկտեմբերի 31–ը չանցկացնեն տոլմա փաթաթելու վրա, քանի որ այն պետք է ուտել թարմ վիճակում։ Բացի այդ, չի կարելի մեկ օրում 5 օրվա ուտելու մթերք պատրաստել։ Մենք պայքարում ենք, որ սուպերմարկետները ժամկետնանց մթերք չվաճառեն, բայց Ամանորին 3 օրվա ստալիչնի սալաթը, 4 օրվա բլինչիկն ու 15 օրվա խոզի բուդն ենք ստիպում, որ մարդիկ ուտեն»,–ասաց վարչապետը։
Փաշինյանի խոսքով` Ամանորից առաջ գումարը ճիշտ բաշխելու անհրաժեշտություն է լինում ու մարդիկ մտածում են` որ երշիկից գնել, որից ոչ կամ ինչքան գնել։ Ուստի, նա առաջարկեց Ամանորի առիթով ներկայացումների տոմսեր գնել։
Ի դեպ, կառավարության նիստից շուրջ մեկ ժամ անց միայն սկսվեց բուն նիստն ու օրակարգային հարցերի քննարկումը։ «Հարգելի գործընկերներ, առաջարկում եմ անցնել կառավարության նիստի օրակարգին։ Ինչպես ասում են` չմոռանանք ինչի համար ենք հավաքվել»,–կատակեց Փաշինյանը։
Ով հայ չէ
Կառավարության նիստում Փաշինյանն անդրադարձավ ևս մեկ խնդրի` աշխատանքով աղքատության հաղթահարմանն ու դրա փոխարեն հաճախ բախվող իրականությանը։ Նա նշեց, որ մեր իրականության մեջ դեպքեր կան, երբ ընտանիքն աղքատության մեջ է` իր բոլոր «կոմպոնենտներով», ասենք` հարբեցող ամուսինով, որը թույլ չի տալիս կնոջը թխվածք թխել ու վաճառել։ Փաշինյանի խոսքով` ինքն անձամբ է ճանաչում նման մարդկանց։
«Եթե ինչ–որ մեկն այս երևույթը կոչում է ազգային ավանդույթ, որը պետք է պահպանվի ու շարունակվի, ապա, իմ կարծիքով` ինքն ուրիշ ազգից է»,–ասաց Փաշինյանը։
«Բրաբուս» ունեցողները նպաստ չեն ստանա
Այսօր կառավարությունը որոշում կայացրեց, որ նրանք, ովքեր ամսական 100 000 դրամ վարկ են փակում, չեն կարող նպաստի համակարգում ընդգրկվել։ Փաշինյանը նշեց, որ այսօր ՀՀ–ում նպաստ ստացող կա, որն ամսական 1 մլն դրամ վարկ է փակում։ Վարչապետի խոսքով` կան մարդիկ, որ պետությունից 30 000 դրամ նպաստ են ստանում ու իրենց «Բրաբուսի» համար էլ 700 000 դրամ վարկ են փակում։
«Նպաստների ցուցակները պետք է մաքրել, որ «Բրաբուս» քշողները նպաստ չստանան»,–ասաց Փաշինյանը։
Նշենք, որ ըստ ժամանակացույցի` 2020–ին կառավարության առաջին նիստը պետք է տեղի ունենա հունվարի 9–ին. կառավարության նիստերը տեղի են ունենում յուրաքանչյուր հինգշաբթի օրերին։
