Տպել
Հայկական ֆուտբոլի լեգենդ Խորեն Հովհաննիսյանը տոնում է ծննդյան 65-ամյակը:
«Արմենպրես»-ի հետ զրույցում Հովհաննիսյանն անկեղծացավ, որ դեռևս չգիտի, թե ինչպես է օրն անցկացնելու, և բացառիկ ծննդյան օր կլինի, թե` ոչ:
Խոսելով նոր սերնդի մասին՝ լեգենդար ֆուտբոլիստը շեշտեց, որ ֆուտբոլը շատ լավ մարզաձև է, սակայն լավ ֆուտբոլիստ դառնալուց առաջ հարկ է, որ կրթված մարդ լինես:
Խորեն Հովհաննիսյանը ծնվել է 1955 թվականին Երևանում: Ֆուտբոլային կարիերան սկսել է 1973 թվականից Երևանի «Արարատ»-ում: Հանդես է եկել «Արարատ», «Իսկրա», «Պախտակոր», «Կիլիկիա», «Փյունիկ» թիմերում: Խորհրդային Միության երիտասարդական թիմի կազմում դարձել է Եվրոպայի երիտասարդական առաջնության հաղթող, իսկ 1980 թվականին` Օլիմպիական խաղերի բրոնզե մեդալակիր: Մարզչական կարիերայի ընթացում Հովհաննիսյանն աշխատել է «Տավրիա», «Հոմենընդմեն», «Կիլիկիա», «Փյունիկ» և Տաշքենդի «Լոկոմոտիվ» ակումբներում: 1996-97 թվականներին եղել է Հայաստանի ֆուտբոլի ազգային թիմի գլխավոր մարզիչ:
«Արմենպրես» լրատվական գործակալությունը շնորհավորում է հայկական ֆուտբոլի լեգենդար ֆուտբոլիստին` մաղթելով անսպառ եռանդ և երկարակեցություն։
