Տպել
Անգլիական Քինգսթոն-ապոն-Հալլ քաղաքից (Իսթ Ռայդինգ օֆ Յորքշիր կոմսություն) 42-ամյա Քելլի Մաքկրաքենը 10 ամսում 38 կգ նիհարել է այն բանից հետո, երբ բժիշկները նրան ասել են, որ մինչև 2020 թվականը չի ապրի, եթե կենսակերպը չփոխի:
Daily Star պարբերականը հայտնում է, որ Քելլին, որը 6 երեխաների մայր է, կշռում էր 128 կգ և մշտապես ուտում էր: Մինչ երեխաները դպրոցում էին, նա ուտում էր շոկոլադի 2 մեծ փաթեթ, ավելին՝ ամեն օր խմում էր 5 լիտր գազավորված ըմպելիք և ամեն երեկո իր համար 2 պիցցա պատվիրում:
Քելլին ավելորդ քաշի պատճառով չէր կարողանում ինքնուրույն քայլել և անգամ լոգանք ընդունել, ուստի նրա զուգընկերը ստիպված էր նրա մասին հոգ տանել:
Քելլիին 2019 թվականի մարտին հոսպիտալացրել էին դիաբետի սրմամբ և հիպերտոնիկ կրիզով: Բժիշկները նրան նախազգուշացրել էին, որ եթե չհրաժարվի սննդային վնասակար սովորություններից, դեռ մինչև Ամանոր նրան հավաստի մահ է սպասում:
Երբ նրան հիվանդանոցից դուրս են գրել, Քելլին որոշել է փոխել իր կենսակերպը և իհարկե՝ սննդակարգը: Նա հրաժարվել է վնասակար սնունդից, դադարել է ուտել քաղցրեղեն ու ֆաստ ֆուդ և անցել է առողջ սննդի: Նա նաև սկսել է մարզադահլիճ հաճախել և ծրագրում է շուտով սկսել նաև վազել: Երբ Քելլին 19 կգ նիհարել է, նրա զուգընկերը տաքսա է գնել, որին հիմա օրական 2 անգամ զբոսնելու է տանում, և զբոսանքները նույնպես դրական են անդրադառնում նրա առողջության ու կազմվածքի վրա:
Քելլիին հաջողվել է 10 ամսում 38 կգ նիհարել: Նրա խոսքով՝ հիմա իրեն նոր մարդ է զգում. նա իրեն հազիվ է ճանաչում հայելուն նայելով:
