Տպել
Հայաստանի Հանրապետությունում սպանդանոցների կառուցման նպատակով շահառուները օգտվում են պետական աջակցության մի քանի ծրագրերից: «Գյուղատնտեսության ոլորտին տրամադրվող վարկերի տոկոսադրույքների սուբսիդավորման» և «Հայաստանի Հանրապետությունում ագրոպարենային ոլորտի սարքավորումների ֆինանսական վարձակալության՝ լիզինգի պետական աջակցության» ծրագրերն «Արմենպրես»-ի հետ զրույցում ներկայացրեց ՀՀ էկոնոմիկայի նախարարի մամուլի խոսնակ Աննա Օհանյանը:
«Առաջին ծրագրով վարկերը տրամադրվում են 3-15 մլն ՀՀ դրամ գումարի սահմաններում՝ 5 տոկոս տոկոսադրույքով: Վարկավորման ժամկետը սահմանվել է մինչև 5 տարի` ելնելով ներդրումների ուղղվածությունից: Կառավարության որոշմամբ հաստատված սոցիալական աջակցություն ստացող սահմանամերձ բնակավայրերի տնտեսավարողներին վարկերը կտրամադրվեն 0 տոկոս, գյուղատնտեսական կոոպերատիվներին` 3 տոկոս տոկոսադրույքով: Վարկերի մարման համար սահմանվում է արտոնյալ ժամկետ՝ մինչև 12 ամիս»,- նշեց Օհանյանը։
Նրա խոսքով՝ մյուս՝ «Հայաստանի Հանրապետությունում ագրոպարենային ոլորտի սարքավորումների ֆինանսական վարձակալության՝ լիզինգի պետական աջակցության» ծրագրով լիզինգը տրամադրվում է ՀՀ դրամով: Այն կլինի մինչև 8 տարի մարման ժամկետով, տարեկան մինչև 11 տոկոս տոկոսադրույքով, որի մինչև 7 տոկոսային կետը սուբսիդավորում է և լիզինգառուի համար վճարվող լիզինգի տարեկան տոկոսադրույքը կազմում է 4 տոկոս։
«Այս դեպքում ևս համապատասխան որոշմամբ սոցիալական աջակցություն ստացող սահմանամերձ բնակավայրերի տարածքներում գործունեություն իրականացնող տնտեսավարողների համար տոկոսադրույքը կազմելու է 0 տոկոս։ Lիզինգառուն վճարելու է լիզինգի առարկայի արժեքի 20 տոկոսի չափով կանխավճար։ Ձեռք բերվող սարքավորումների արժեքների հանրագումարը մեկ տնտեսավարողի համար կկազմի մինչև 450 մլն դրամ»,- ընդգծեց ՀՀ տնտեսական զարգացման և ներդրումների նախարարի մամուլի խոսնակը։
Օհանյանն ասաց՝ այժմ քննարկվում և վերանայվում են պետական աջակցության ծրագրերի ուղղությունները՝ առավել արդյունավետ դարձնելու պետական աջակցության գործիքակազմը՝ սպանդանոցներ հիմնելու և վերազինելու համար:
Լիլիթ Դեմուրյան
