Տպել
Դերասանուհի Սիլվի Բարկովան, որն ամուսնությունից հետո տեղափոխվել էր Հնդկաստան եւ տեւական դադար էր վերցրել նկարահանումներից, կրկին անցել է աշխատանքի: Սիլվին արդեն մի քանի ամիս է, ինչ հայրենիքում է. այս ընթացքում դերասանուհին հարցազրույցներում միշտ խոստանում էր երկրպագուներին, որ այստեղ լինելու շրջանում չի թողնի, որ իրեն կարոտեն: Ասաց եւ արեց…
Սիլվին այս շրջանում նկարահանվում է «Ընտանեկան գաղտնիքներ» նախագծում, որը շատ շուտով կլինի եթերում:
«Նկարահանման առաջարկը ստացել եմ նախագծի ռեժիսորի օգնականից. դեռ չգիտեմ՝ որքան կտեւեն նկարահանման աշխատանքները, բայց կարծում եմ՝ ես մինչեւ ավարտը դժվար մնամ այստեղ: Նախագիծը տարբար պատմությունների շարք է, որոնց ընթացքում դերասանները տարբեր կերպարների են մարմնավորում»,-NEWS.am STYLE-ի հետ զրույցում մանրամասնեց դերասանուհին:
Խոսելով անձնակազմի եւ մյուս դերասանների մասին՝ Սիլվին նշեց, որ մեծ մասի հետ ծանոթ չի եղել, բայց դա չի խանգարել, որպեսզի լիարժեք աշխատեն նկարահանման հրապարակում: Պատասխանելով հարցին, թե որքանով էր կարոտել էկրանային աշխատանքն ու նկարահանումները՝ դերասանուհին նշեց.
«Անկեղծ ասած՝ ես չեմ զգացել այդ դադարը: Նորմալ զգացողություններ ունեի, ոչ մի արտառոց բան»:
Սիլվին չգիտի՝ իր մասնակցությամբ առաջին սերիան երբ կլինի եթերում, բայց խոՍտացավ, որ երկրպագուները շատ չեն սպասի:
