Տպել
Ռուսաստանի քաղաքացիություն հնարավոր կլինի ձևակերպել առանց մեկ այլ երկրի քաղաքացիությունից հրաժարվելու։
«Կոմերսանտ» թերթը գրում է, որ կառավարությունը պատրաստվում է փոփոխություններ անել «ՌԴ քաղաքացիության մասին» օրենքում, նախագծի աշխատանքները մոտենում են ավարտին։ Հնարավոր է` արդեն այս ամիս օրինագիծը մտնի Պետդումա։
Նախագծով զբաղվում է Պետական միգրացիոն քաղաքականության հայեցակարգն իրականացնող խումբը, որի առաջ խնդիր է դրված հնարավորինս շատ քաղաքացիներ (5-10 մլն) ներգրավել Ռուսաստան։ Հարցը լուծում են միգրացիոն ռեժիմի փոփոխման և քաղաքացիության ինստիտուտի բարեփոխման միջոցով։
Նախագծով նախատեսվում է ուժը կորցրած ճանաչել «ՌԴ քաղաքացիության մասին» օրենքի 13 հոդվածի առաջին մասի «գ» կետը, որի համաձայն` այլ երկրի քաղաքացիություն ունեցողների համար ՌԴ քաղաքացիություն ստանալու պայմաններից մեկն իրենց քաղաքացիությունից հրաժարվելն է։
«Առաջարկվում է բացառել ռուսական քաղաքացիություն հայցողի` օտարերկրյա պետության իրավասու մարմնին իր քաղաքացիությունից հրաժարվելու մասին դիմելու պահանջը, այդ թվում այն անձանց համար, որոնք ռուսաց լեզվի կրող են ճանաչվել», – թերթի հարցմանն ի պատասխան հայտնել են Կրեմլի մամուլի ծառայությունից։
Օրինագծի մշակման աշխատանքն ավարտման փուլում է, նախագահի վարչակազմի հետ համաձայնեցնելուց հետո կուղարկվի Պետդումա։
Միգրացիոն օրենսդրությունը, ինչպես նաև ՌԴ քաղաքացիություն ստանալու նորմերը փոխելու գործընթացը մեկնարկել է 2018 թվականին։ Պետական միգրացիոն քաղաքականության հայեցակարգը (գործում է մինչև 2025 թվականը) սահմանում է բացել Ռուսաստանը բոլոր նրանց համար, ովքեր ուզում են ապրել և աշխատել այնտեղ, պարզեցնել մուտքի կանոնները` ներառյալ վիզայի տրամադրումը, ինչպես նաև Ռուսաստանի քաղաքացիություն տալու ընթացակարգը։
Ըստ այդ հայեցակարգի` միգրացիոն քաղաքականությունը պետք է ուղղված լինի Ռուսաստան կամավոր տեղափոխվելու համար բարենպաստ պայմաններ ստեղծելուն, այդ թվում` երկիրը լքած քաղաքացիների համար, որոնք կարող են ներառվել դրական սոցիալական կապերի համակարգում և դառնալ հասարակության լիիրավ անդամ։
