Տպել
ԱՄՆ դեսպանի մշակութային արժեքների պահպանության հիմնադրամի ֆինանսավորմամբ վերականգնվել է Հակոբ Հակոբյանի «Սարերում» որմնանկարը: Որմնանկարի վերականգնման ու պահպանության աշխատանքների ավարտին՝ դեկտեմբերի 2-ին, Գյումրու Վարդան Աճեմյանի անվան պետական դրամատիկական թատրոնի սրահում, որտեղ այս պահին տեղ ափոխվել է որմանկարը, կատարված աշխատանքների մասին խոսեցին ՀՀ-ում ԱՄՆ դեսպան Ռիչարդ Միլսը և ՀՀ մշակույթի նախարար Արմեն Ամիրյանը:
Որմնանկարի հեղինակը հայտնի հայ գեղանկարիչ Հակոբ Հակոբյանն է, ում ստեղծագործությունները համարվում են ազգային գանձեր: Նրա որմնանկարները տեղ են գտել Շիրակի մարզի պահպանվող պատմամշակութային արժեքների ցանկում: Երկար տարիներ որմնանկարը գտնվում էր Գյումրու «Քարհատմեքենա» գործարանի տարածքում: 1988 թ. Սպիտակի երկրաշարժից հետո «Սարերում» որմնանկարը հայտնվել էր խիստ վթարային, չօգտագործվող տարածքներում: Որմնանկարի համար որպես հենք ծառայող ճաշարանի խոհանոցը դահլիճից բաժանող ոչ հիմնական, միջնորմ հանդիսացող պատը« տարբեր հատվածներում ուներ մեծ ճաքեր, որոնք իրական սպառնալիք էին որմնանկարի անվտանգ ու ամբողջական պահպանության համար: Ջերմաստիճանի կտրուկ տատանումները ևս իրենց բացասական ազդեցությունն են ունեցել որմնանկարի հիմնասվաղի և գունային շերտերի վրա:
«Սարերում» որմնանկարի վերականգնման աշխատանքները կատարվել են Մինաս Ավետիսյան մշակութային հիմնադրամի կողմից, Իտալիայի Ֆլորենցիա քաղաքի Ռեստավրացիայի ինստիտուտի ճանաչված վերականգնող մասնագետ Ֆաբրիցիո Յակոպինիի մասնակցությամբ: «Վերականգնողի աշխատանքը սիրո ու հարգանքի դրսևորում է նկարիչների ու նրանց ստեղծագործությունների հանդեպ: Իսկ այդ նվիրված ու ջերմեռանդ աշխատանքի արգասիքն այսօր բոլորս ենք տեսնում»« – ասաց դեսպան Միլսը:
