Տպել
Հունիսի 1-ից Հունաստանում համընդհանուր ԲՑԺ պատվաստում կսկսվի, նպատակը երկրի բնակիչներին կորոնավիրուսից պաշտպանելն է, հաղորդում է ՌԻԱ Նովոստին՝ հղում անելով Neakriti-ին:
Այդ միջոցին հավանություն է տվել դեղամիջոցների հարցերով ազգային գործակալությունը, պատվաստում կանցկացվի Աթենքում, Սալոնիկում, Պատրայում եւ այլ քաղաքներում:
ԲՑԺ պատվաստման արդյունավետությունը գիտնականները հաստատել են հետազոտության ընթացքում: Պարզվել է, որ 3 տարվա ընթացքում պատվաստված մարդիկ 5 անգամ քիչ են ենթարկվել ռեսպիրատոր վարակներով վարակվելու ռիսկին:
«Երբ չկա հատուկ պատվաստանյութ, կարելի է կոլեկտիվ իմունիտետ զարգացնել ընդհանուր պաշտպանություն ապահովվող պատվաստանյութի միջոցով»,-ասել է Աթենքի ազգային համալսարանի պրոֆեսոր Էվանգելոս Յամարելոսը:
Նա նշել է, որ պատվաստումից առաջ պացիենտները կորոնավիրուսի նկատմամբ հակամարմինների թեստ կհանձնեն:
ԲՑԺ-ն տուբերկուլոզի դեմ պատվաստանյութ է: Մի շարք երկրներում այն պատվաստում են ծնվելուց հետո բոլոր երեխաներին, եւ դրա գործողությունը պահպանվում է կյանքի ողջ ընթացքում:
Այդ կապակցությամբ ենթադրվում է, որ երկրներում, որտեղ ԲՑԺ զանգվածային պատվաստում տեղի կունենա, կորոնավիրուսով հիվանդացության մակարդակը կնվազի:
