Տպել
SHAMSHYAN.com-ն ահազանգ է ստացել Ռուսաստանի Դաշնության Տոմսկ քաղաքի՝ էմիգրանտների համար նախատեսված կացարանում 4 ամիս պահվող 32-ամյա Էդգար Գրիգորյանից, ով հայտնել է, որ մարտի 18-ից վիզայի ժամկետը լրանալու հետեւանքով պահվում է կացարանում, մինչդեռ Ռուսաստանում ՀՀ դեսպանատունը ոչինչ չի ձեռնարկում իր՝ Հայաստան վերադարձը կազմակերպելու ուղղությամբ:
SHAMSHYAN.com-ի թղթակցի հետ զրույցում Է. Գրիգորյանն ասում էր. «Ինձ 4 ամիս է, պահում են Տոմսկի՝ դեպորտացիայի ենթարկված անձանց պահման կացարանում: 10 րոպե առաջ մարդու իրավունքների պաշտպանն էր եկել, իրենք ասում են, որ մեր պետությունը փող չի մուծում ինձ համար, որ վերադառնանք, եւ երկրորդը, իմ անձնագրի մեջ մարտի 18-ի դրությամբ պեչատը խփած է, որ ես իրավունք չունեմ 5 տարվա ընթացքում հետ գալ ՌԴ: Ես ավելի լավ է մի հանցագործություն արած լինեյի, գնայի բանտ նստեի, քան էս պայմաններում մնամ: Իրենք բացատրում են, թե ճանապարհները փակ են եւ ուղիղ չվերթ չկա:
Քիչ առաջ մեր փաստաբանը խոսեց դատարանի կատարածուների հետ, իրենք բացատրում են, որ եթե ուզում եմ իմ հաշվին գնալ, ապա պետք է 2 ուղեկցողի համար երկկողմանի տոմս գնեմ մինչեւ Մոսկվա, նաեւ ինձ համար: Ամենասկզբում, երբ դեռ սահմանները փակ չէին, տոմսերն էլ էժան էին, մենք իրենց առաջարկել էինք, որ տոմս առնենք, վերադառնանք, բայց չէին համաձայնում:
Հիմա էլ պատճառաբանում են, թե ճանապարհները փակ են, իսկ մարդու իրավունքների պաշտպանն ասում է, որ իրենք կապ չունի եւ Հայաստանի իշխանությունները պետք է զբաղվեն»:
Է. Գրիգորյանի խոսքով՝ դեսպանատանը, սակայն, հեռախոսազանգերին չեն պատասխանում. «Էս ամբողջը պետք է կազմակերպի դեսպանատունը, իրենք պետք է փողը փոխանցեն, որ մեր տոմսերը առնեն, ուղարկեն, Հիմա էլ ում դիմում ենք, ասում են՝ տեղեկություն չունենք, կատարածուները փաստաբանին հիմա էլ ասել են, թե մինչեւ սեպտեմբերի 15-ը պետք է մնամ, ու չեն էլ հաստատում, որ եթե անգամ ես իմ միջոցներով գնեմ իմ եւ ուղեկցողների տոմսերը, ապա հաստատ չի, որ ինձ կուղարկեն, անորոշ վիճակ է:
Կատարածուներն ասում են, որ դիմել են մեր դեսպանատուն, որ էսպիսի անձ կա, ու դեսպանատնից պատասխանել են, թե չարթերային թռիչքներով դեպորտի ենթարկված անձանց չեն տեղափոխում»:
