Տպել
Արտասահմանից վերադարձած կինը կորոնավիրուսով է վարակել 71 մարդու՝ վերելակում անցկացնելով ընդամենը մեկ րոպե: Այս մասին հայտնել են ԱՄՆ Հիվանդությունների վերահսկման և կանխարգելման կենտրոնի աշխատակիցները, փոխանցում է news.com.au-ն:
Այս դեպքը ցույց է տալիս, թե որքան վտանգավոր կարող են լինել վիրուսի ասիմպտոմ կրողները: ԱՄՆ-ից Չինաստան վերադարձած այս կնոջ մոտ ոչ մի ախտանիշ չի եղել, բայց նա, միևնույն է, վերադառնալուց հետո 2 շաբաթով ինքնամեկուսացել է: Այդ ամբողջ ժամանակահատվածում նա մնացել է իր բնակարանում, կերակուրը առաքմամբ է պատվիրել: Չնայած այս ամենին, հենց նա է դարձել «զրոյական պացիենտը», ումից վարակվել է ևս 71 մարդ:
Հեյլունցզյան նահանգում մարտի 11-ից կորոնավիրուսի նոր դեպքեր չէին գրանցվել: Ապրիլի 2-ին մի տղամարդ ծանր կաթված է ստացել (կորոնավիրուսային ինֆեկցիայի ժամանակ կաթվածներ կարող են պատահել թրոմբի առաջացման մեծ ռիսկի պատճառով): Նրան հոսպիտալացրել են, և նրա 3 որդիները նրա հետ միասին ուղևորվել են հիվանդանոց: Նրանք կարճ ժամանակում հասցրել են վարակել ևս 28 մարդու, այդ թվում՝ մի բժշկի և 5 բուժքրոջ:
Կաթվածով տղամարդուն այնուհետև տեղափոխել են այլ հիվանդանոց, որտեղ նրանից վարակվել է ևս 20 մարդ: Միայն այդ ժամանակ են նրա մոտ կորոնավիրուսային ինֆեկցիա ախտորոշել:
Մյուս տղամարդը, ում անվանում են В պացիենտ, նույնպես վարակվել էր կորոնավիրուսով: Նրա ամբողջ շրջապատին թեստավորելով՝ մասնագետները հայտնաբերել են, որ գրեթե բոլորը վարակված էին, այդ թվում՝ կաթվածով տղամարդը, ում մասին նշվեց վերևում:
Մասնագետները սկսել են փնտրել վարակման աղբյուրը՝ ինֆեկցիայի տարածումը կասեցնելու համար: Նրանք նաև անցկացրել են վիրուսի գենետիկ անալիզ և հայտնաբերել, որ այն տարբերվում է անցյալում այդ տեղանքում շրջանառվող վիրուսից: Վիրուսը, որով այս բոլոր պացինետները վարակվել էին, ակնհայտորեն բերվել էր արտասահմանից:
Բայց վարակվածներից ոչ մեկը վերջին շաբաթներին արտասահմանում չէր եղել:
Հուսահատված մասնագետները ապրիլի 9-ին սկսել են ուսումնասիրել վարակված շրջանում բնակվող բոլորի տվյալները: Եվ նրանց հաջողվել է գտնել վերջերս ԱՄՆ-ից եկած կնոջը: Կինն իրեն լավ էր զգում և ոչ մի ախտանիշ չուներ, սակայն նրա մոտ հայտնաբերվել են կորոնավիրուսի դեմ հակամարմիններ: Նա վերադառնալուց հետո հարևաններից ոչ մեկի հետ չի շփվել և ինքնամեկուսացած է եղել, ուստի մասնագետները մի որոշ ժամանակ չէին կարողանում հասկանալ, թե նա ինչպես կարող էր որևէ մեկին վարակել:
Հետո նրանք հասկացել են, որ տուն վերադառնալով կինը 60 վայրկյան բարձրացել է վերելակով: Հավանաբար, նրանից հետո վերելակ է մտել В պացիենտի դուստրը, որը վարակվել է, վարակել իր մերձավորներին, իսկ նրանք՝ մյուս մարդկանց: Արդյունքում 71 մարդ վարակվել է վերելակով «զրոյական պացիենտի» բարձրանալուց հետո:
Մասնագետների խոսքով՝ այս դեպքն ակներևորեն ցույց է տալիս, որ ասիմպտոմ պացիենտները շրջապատողների համար այսօր էլ մեծ վտանգ են ներկայացնում:
