Տպել
Հրավիրված մամուլի ասուլիսի ընթացքում պատասխանելով «Հրապարակ» թերթի հարցին, թե որքանո՞վ են ճիշտ այն տեղեկությունները, որ պատերազմի ժամանակ ինքը Նիկոլ Փաշինյանի տինոջը՝ Աննա Հակոբյանին խնդրել է հրամանատարական կետից դուրս գալ, ՀՀ պաշտպանության նախարարության ռազմական վերահսկողական ծառայության նախկին պետ, գեներալ Մովսես Հակոբյանը պատասխանեց, որ հրամանատարական կետում Աննա Հակոբյանը մոնիտորով դիտելիս է եղել ռազմական գործողությունները։
Մովսես Հակոբյանը մոտեցել է և քաղաքավարի խնդրել, որ Աննա Հակոբյանը դուրս գա հրամանատարական կետից, քանի որ մոնիտորով միշտ չէ, որ երևում են մեր զինծառայողների հաջողված գրոհները, և թեժ մարտեր են ընթանում, բացի այդ՝ հրամանատարական կետում տղամարդիկ են, որոնք հնարավոր է և պահի ազդեցության տակ հայհոյեն, և լավ կլինի, որ տիկին Աննան դուրս գա, չլսի այդ հայհոյանքները, զինծառայողներն էլ չկաշկանդվեն։ Աննա Հակոբյանը դուրս է եկել հրամանատարական կետից, այնուհետև Մովսես Հակոբյանին զանգել և կանչել են Երևան։ Հակոբյանը 4 ժամում հասել է Երևան, և ՀՀ Պաշտպանության նախարար Դավիթ Տոնոյանը նրան ասել է, որ իրեն հրամայվել է` Մովսես Հակոբյանին թույլ չտալ գնալ Արցախ։ Մ․ Հակոբյանը ասուլիսի ընթացքում նաև ցույց է տվել իր նամակները՝ ուղղված վարչապետին, որոնցում նա խնդրել է իրեն ուղարկել Արցախ, քանի որ անհանգիստ է, և իր սիրտը չի դիմանում, բայց այդ բոլոր նամակներն անտեսվել են։
