Տպել
Հայաստանի բանկերի միությունը, հավատարիմ մնալով կորպորատիվ-սոցիալական պատասխանատվության սկզբունքներին, բանկերի հետ համատեղ իրականացրել է աջակցության ծրագրեր Շիրակի և Լոռու մարզերում։ Հայաստանի բանկերի միության հասարակայնության հետ կապերի ծառայությունը տեղեկացնում է, որ Շիրակի մարզի Քարաբերդի միջնակարգ դպրոցում թեև ուսումնական տարին մեկնարկել էր դեռևս սեպտեմբերից, սակայն գյուղի միակ դպրոցի 140 աշակերտ ուսումնական հաստատություն չէր հաճախում: Պատճառը ոչ միայն համավարակն էր, այլ մայիս ամսին ուժեղ քամու հետևանքով քանդված տանիքը, ինչի պատճառով վնասվել էր նաև դպրոցի գույքն ու ներքին հարդարումը: Աջակցության ակնկալիքով Շիրակի մարզպետարանը դիմել էր նաև Հայաստանի բանկերի միությանը և Հայաստանի բանկերին: Արձագանքն իրեն երկար սպասել չտվեց. արդյունքում տանիքն արդեն ամբողջությամբ նորոգված է, և դպրոցը վերադարձել է բնականոն աշխատանքի:
Աջակցության հերթական ծրագրով ՀԲՄ հաջորդ կանգառը Լոռու մարզի Շիրակամուտ համայնքում էր: Այստեղ բանկերի աջակցությամբ կառուցվեց ֆուտբոլի նոր խաղադաշտի ցանկապատը:
