Տպել
Առողջապահության նախարար Արսեն Թորոսյանը եւ Կորեայի Հանրապետության Առողջության ապահովագրության դիտարկման եւ գնահատման ծառայության նախագահ Սուն Մին Կիմն առողջապահության անվտանգության ազգային համակարգի համագործակցության շրջանակներում առցանց ստորագրել են փոխըմբռնման հուշագիր:
Հիմք ընդունելով երկու երկրի միջեւ դրական փորձը` այս քայլով կողմերն ամրապնդում եւ ընդլայնում են համագործակցությունն ու հարաբերությունները:
Հուշագրի համաձայն՝ կողմերը պայմանավորվածություն են ձեռք բերել ըստ անհրաժեշտության պարբերաբար կազմակերպել հանդիպումներ՝ ուղղված առողջապահության անվտանգության ազգային համակարգի ամրապնդմանը: Միաժամանակ, նախատեսվում է փորձի փոխանակում ռազմավարական գնումների իրականացման մեխանիզմների շրջանակում, կկազմակերպվեն վերապատրաստման դասընթացներ առողջապահության որակի գնահատման, դեղորայքային քաղաքականության, առողջապահական ռեսուրսների արդյունավետ կառավարման, առողջապահության քաղաքականության մշակման նպատակով տեղեկատվական հաղորդակցման համակարգի առավել արդյունավետ կիրառման ուղղություններով:
Կողմերը հույս են հայտնել, որ 2021 թվականը խաղաղ եւ ապահով տարի կլինի եւ հնարավորություն կընձեռի իրագործելու նախանշված բոլոր ծրագրերն ու անելիքները։
