Տպել
«Դեպի Եվրատեսիլ» նախագծից բոլորիս հայտնի Իջինը, ով դուրս մնաց նախագծի երզափակիչ փուլից, դեռ երկար կհիշվի։
Ամենաքննարկվող մասնակիցն առանձնանում էր իր գրավիչ արտաքինով, որն էլ իր գլխավոր այցեքարտն է դարձել։
Wnews.am-ը շարունակում է ներկայացնել հայտնիների գեղեցկության գաղտնիքները։ Այս անգամ իր գեղեցկության և գրավչության գաղտնիքների մասին Wnews.am-ին պատմել է Իջինը։
– Իջին, ըստ Ձեզ, որո՞նք են կանացի գրավչության 5 գլխավոր բաղադրչիները։
– Ըստ իս, երբ կինը ներդաշնակ է ինքն իր հետ, նշանակում է, որ իր մեջ կան գրավչության բոլոր բաղադրիչները։
– Որն է Ձեր գրավչության գաղտնիքը: Կա՞ ինչ որ բան, որ կուզենայիք փոխել:
– Ես ներդաշնակ եմ ինքս ինձ հետ, ուստի ոչ, չկա։
– Մեր օրերում գեղեցկությունը բավականին հասանելի է դարձել պլաստիկ վիրահատությունների միջոցով։ Դուք պլաստիկ վիրահատության դիմե՞լ եք, ինչպե՞ս եք վերաբերվում դրանց։
– Յուրաքանչյուր մարդու համար դա անձնական խնդիր է, ամեն մարդ ինքն է որոշում՝ ինչպես գեղեցիկ երևալ. մեկը պլաստիկ վիրահատությամբ է գեղեցիկ երևում, մյուսը՝ դիմահարդարվելով կամ այլ միջոցներով։ Ամեն մի որոշում ճիշտ է, երբ կինն իրեն վստահ ու երջանիկ է զգում։
– Հաճախ եք հայտնվում մամուլի ուշադրության կենտրոնում, հատկապես արտաքինի մասին քննարկումներով: Ինչպե՞ս եք դրանց արձագանքում:
– Ձեր տված հարցերից պարզվում է, որ այո, հաճախ եմ հայտնվում, իսկ արձագանքս նորմալ է։
– Որքա՞ն ժամանակ եք հատկացնում Ձեր առօրյա դիմահարդարմանը։ Ո՞ր պարագաներն եք միշտ օգտագործում։
– Իմ դիմահարդարումը կախված է այդ օրվա պլաններից. նայած, թե ուր պետք է գնամ։ Ամենորյա պարագաներից միայն աչքերի սև մատիտ։
– Կկիսվե՞ք խնամքի մի բաղադրատոմսով (օրինակ՝ դիմակ, որը պարբերաբար քսում եք դեմքին)։
– Ինչպես մայրիկս է ասում՝ «ինչքան քիչ զիբիլ քսես երեսիդ, այդքան շնորհակալ կլինի քո մաշկը », իսկ ընդհանրապես օգտվում եմ մաշկը սնուցող և խոնավեցնող միջոցներից։ Դեռ իմ մաշկն ավել ոչ մի այլ բանի կարիք չի զգում։
– Դիետաներ պահու՞մ եք, հետևու՞մ եք սննդակարգին, մարզասրահ այցելու՞մ եք։
– Ես այն հազվադեպ մարդկանցից եմ, ով ամեն ինչ ուտում է, ցանկացած ժամին սնվում, բայց միևնույնն է՝ նիհարում։ Մարզասրահ այցելում եմ մկանային զանգված հավաքելու և քաշ ավելացնելու համար։
– Ո՞վ է գեղեցկության Ձեր խորհրդանիշը։
– Ինձ համար փոքրուց գեղեցկության չափանիշ է եղել մայրս, ումից շատ բաներ եմ սովորել և մինչ օրս էլ սովորում եմ, իսկ հայտնի մարդկանցից կարող եմ նշել Մոնիկա Բելուչիին և Սալմա Հայեքին։
– Գեղեցկությունն օգնո՞ւմ, թե խանգարում է Ձեզ կարիերայի հարցում:
– Գեղեցկությունը բոլոր ժամանակներում իրենից ներկայացրել է մեծ ուժ, զենք, բայց այդ զենքը պետք է ճիշտ օգտագործել։ Իմ կարծիքով՝ առանց ներքին գեղեցկության արտաքին գեղեցկությունը կորցնում է իր ուժը։ Իսկ մեր ասպարեզում ամենակարևորն անկեղծ լինելն է։
– Համաձա՞յն եք, որ տղամարդիկ սիրում են աչքերով:
– Ավելի ճիշտ կլինի այդ հարցով իրենց դիմել։
– Համաձա՞յն եք, որ գեղեցիկ մարդկանց ամեն բան ավելի հեշտ է տրվում:
– Դա սխալ կարծիք է։ Ամեն մարդ ունի իր ճանապարհն իր դժվարություններով հանդերձ։ Ամեն ինչ Աստծո ձեռքերում է։ Կարող եմ նշել այնպիսի գեղեցկուհիների, ինչպիսիք Էլիզաբեթ Թեյլորն էր, Մերլին Մոնրոն և ուրիշները։
– Արտաքինի հետ կապված երբևէ բարդույթներ ունեցե՞լ եք։
– Ոչ, չի եղել նման դեպք։
– Իսկ աղջիկների նախանձի առարկա եղե՞լ եք:
– Ես նրանց փոխարեն դժվարանում եմ պատասխանել։ Կարող եմ միայն ասել, որ այդ զգացողությունն ինձ համար խորթ է։
– Եվրատեսիլի բեմում գեղեցկությունը պարտադի՞ր է: Ըստ Ձեզ, Էլ ի՞նչ է հարկավոր այդ մրցությում հաղթելու համար։
– Իմ կարծիքով Եվրատեսիլի բեմի համար շատ կարևոր է ճիշտ երգի ընտրությունն ու այն ճիշտ ներկայացնելը։
– Ամենայուրահատուկ հաճոյախոսությունը, որ լսել եք Ձեր երկրպագուներից արտաքինի հետ կապված:
– Իմ մասին բոլոր հաճոյախոսություններն էլ շատ հաճելի ու թանկ են։ Շա եմ սիրում իմ երկրպագուներին և շատ շնորհակալ եմ իմ հանդեպ իրենց սիրո և աջակցության համար։
wnews.am
