Տպել
Տվյալների գիտական անալիզը ապացույցներ չի գտել, որ որոշ պատվաստված պացիենտների մոտ երակային թրոմբոէմբոլիայի դեպքերը առաջացել են AstraZeneca-ի պատվաստանյութի ազդեցությամբ: Այս մասին հայտարարել է Դեղամիջոցների եվրոպական գործակալությունը՝ հավելելով, որ հնարավոր է համարում այս դեղամիջոցով զանգվածային պատվաստման շարունակումը:
Կարգավորողի հայտարարության մեջ նշված է, որ թրոմբոզի դեպքերի հաճախությունը կազմում է Մեծ Բրիտանիայում պատվաստված մեկ միլիոնին մեկից քիչ մարդ՝ ոչ ավելի, քան չպատվաստված պոպուլյացիայի շրջանում, հայտնում է Medportal.ru-ն: Փորձագետների կարծիքով՝ այս պացիենտների մոտ թրոմբոզը կարող է առաջացած լինել այլ պատճառներով:
«Մենք չափազանց փոքր թվով տեղեկություններ ենք ստացել գլխուղեղի երակներում թրոմբների չափազանց հազվագյուտ տեսակի մասին(սինուսային երակների թրոմբոզ), որ առաջանում են պատվաստվելուց հետո կարճ ժամանակ անց թրոմբոցիտների մակարդակի նվազման հետ միասին: Թրոմբի այս տեսակը կարող է բնականորեն առաջանալ այն մարդկանց մոտ, որոնք չեն պատվաստվել, ինչպես նաեւ COVID-19-ով պացիենտների մոտ»,- հայտնել է գործակալության գործադիր տնօրեն Ջուն Ռեյնը:
Բուժկարգավորողը մարդկանց խորհուրդ է տվել պատվաստումից չհրաժարվել, քանի որ պատվաստման առավելությունները գերազանցում են պոտենցիալ կողմնակի էֆեկտների ռիսկերը:
Նշենք, որ նորվեգացի գիտնականների խումբը հաստատել է վտանգավոր կողմնակի էֆեկտի ի հայտ գալու վտանգը, որն առաջանում է կորոնավիրուսի դեմ AstraZeneca-ի մշակած պատվաստանյութի հետեւանքով:
Հիշեցնենք, որ Եվրամիության մի քանի երկրներ ժամանակավորապես կասեցրել են բրիտանա-շվեդական AstraZeneca ընկերության դեղամիջոցով պատվաստումը պատվաստվածների մոտ հնարավոր թրոմբոէմբոլիայի բարդությունների մասին մի շարք տեղեկությունների պատճառով:
