Տպել
Ռուսական «Մեգաֆոն» հեռահաղորդակցային ընկերության գործադիր տնօրեն Խաչատուր Փոմբուխչանը կդառնա ընկերության գլխավոր տնօրեն, իսկ «Մեգաֆոն»-ի ներկայիս ղեկավար Գևորգ Վերմիշյանը կդառնա տնօրենների խորհրդի անդամ և կկենտրոնանա միջազգային և ռազմավարական ակտիվների զարգացման վրա: Այս մասին ասվում է ընկերության հայտարարության մեջ, գրում է ՏԱՍՍ գործակալությունը:
«Ընկերության ներկայիս ղեկավար Գևորգ Վերմիշյանը կմիանա դրա տնօրենների խորհրդին և կկենտրոնանա «Մեգաֆոն»-ի միջազգային և ռազմավարական ակտիվների զարգացման վրա: Համապատասխան որոշումը շուտով կներկայացվի «Մեգաֆոն»-ի տնօրենների խորհրդին` ընդհանուր ժողովում հետագա հաստատման համար: Փոփոխությունները սպասվում են 2021 թվականի հուլիսի 1-ից», – ասվում է հաղորդագրության մեջ:
Ըստ «Մեգաֆոն»-ի տնօրենների խորհրդի նախագահ Իվան Ստրեշինսկիի, որի խոսքերը մեջբերվում են ընկերության հաղորդագրության մեջ, Խաչատուր Փոմբուխչանը ընկերությունը կզարգացնի նոր պայմաններում և իրողություններում, որում հայտնվել է հեռահաղորդակցության ընկերությունը 2020 թվականից հետո: Նա կշարունակի իրականացնել «Մեգաֆոն»-ի ռազմավարությունը, որի վեկտորը սահմանվել է վերջին մի քանի տարիների ընթացքում, և կկենտրոնանա ընկերության բոլոր հիմնական ցուցանիշների հետագա աճի վրա:
