Տպել
ԱՄՆ-ի եւ Թուրքիայի միջեւ տարաձայնությունների քննարկումը կդառնա երկու երկրների նախագահներ Ջո Բայդենի եւ Ռեջեփ Թայիփ Էրդողանի առաջիկա հանդիպման օրակարգի հիմնական հարցը:
Ինչպես հայտնում է ՏԱՍՍ-ը, ելույթ ունենալով Սենատի արտաքին հարաբերությունների հանձնաժողովի լսումներին՝ ԱՄՆ պետքարտուղար Էնթոնի Բլինկենն ասել է, որ «մեր տարաձայնությունները գաղտնիք չեն»:
Նրա խոսքով, «շատ առումներով Թուրքիան չի գործում այնպես, ինչպես պետք է գործի ՆԱՏՕ-ի դաշնակիցը»: «Դա վերաբերում է նաեւ Ռուսաստանից Ս-400 համակարգերի գնմանը», – ասել է Բլինկենը:
Բացի այդ, նա նշել է, որ Թուրքիան «խորապես անհանգստացնող» գործողություններ էր ձեռնարկել Արեւելյան Միջերկրական ծովում:
Նախատեսվում է, որ Էրդողանի եւ Բայդենի բանակցությունները տեղի կունենան հունիսի 14-ին Բրյուսելում կայանալիք ՆԱՏՕ-ի գագաթնաժողովի շրջանակներում: Դա կլինի նրանց առաջին հանդիպումը պետությունների ղեկավարների կարգավիճակում:
