Տպել
Միլիարդատեր Նուբար Աֆեյանը՝ կորոնավիրուսի դեմ Moderna պատվաստանյութի արտադրողի համահիմնադիրը, նշել է, որ COVID-19-ի դեմ պատվաստումը կարող է սովորական ընթացակարգ դառնալ, գրում է Forbes-ը:
«Ինձ թվում է, որ երբ բավական ժամանակ անցնի, մենք կարող ենք հայտնվել այնպիսի իրավիճակում, երբ պատվաստումներ անենք, ասենք, տարին առնվազն մեկ անգամ, ինչպես՝ գրիպի դեպքում»,- ասել է Աֆեյանը Bloomberg TV-ի եթերում:
Moderna-ն ներկայումս թեստավորում է կրկնակի պատվաստման համար իր պատվաստանյութի կես չափաբաժնի ներարկումը, եւ այն, «ըստ երեւույթին, չափազանց արդյունավետ է»,- ասել է Աֆեյանը: Նա նաեւ հայտնել է, որ իր Flagship Pioneering ընկերությունը ներդրումներ է կատարում տեխնոլոգիաներում, որոնք կարող են օգնել աշխարհին պատրաստվել նոր համավարակին: Ըստ Աֆեյանի՝ խոսքը մեքենայական ուսուցման եւ արհեստական բանականության տեխնոլոգիաների մասին է: Նա պատմել է մոդելավորման հնարավորության մասին, թե «ուր կարող է այդ վիրուսը գնալ՝ ելնելով նրանից, թե որտեղ է այն արդեն եղել», ինչպես նաեւ՝ նոր շտամների առաջացման կանխատեսման:
Օգոստոսի սկզբին Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրիեսուսն ասել էր, որ ԱՀԿ-ն կոչ է անում կրկնակի պատվաստումների մորատորիում անցկացնել առնվազն մինչեւ սեպտեմբերի վերջ: Նա հիմնավորել է դա նրանով, որ անհրաժեշտ է անցում կատարել մի իրավիճակից, երբ պատվաստանյութի չափաբաժինների հիմնական մասն ուղարկվում են հարուստ երկրներ, իրավիճակին, երբ հիմնական մասը ստանում են աղքատ երկրները: Մորատորիումն անհրաժեշտ է՝ յուրաքանչյուր երկրում բնակչության առնվազն 10 տոկոսի պատվաստումն ապահովելու համար, նշել էր ԱՀԿ ղեկավարը:
news.am
