Տպել
Կառավարությունն այսօր որոշել է Պետական եկամուտների կոմիտեի Գուգարքի տարածաշրջանային մաքսատան Բագրատաշեն մաքսակետի զբաղեցրած և սպասարկման համար հատկացված տարածքից «Դյութի Ֆրի Հոլդինգ» ՍՊԸ-ին կառուցապատման իրավունքով տրամադրել 278 քմ մակերեսով հողամաս:
Հիմնավորվել է, որ կառավարության ներկայացված նախագիծը հնարավորություն կընձեռնի մաքսակետի տարածքում հիմնել անմաքս առևտրի սրահ` ավելի արդյունավետ դարձնելով հողերի նպատակային օգտագործումը: Ակնկալվում է, որ նախագծի ընդունումը կնպաստի ներդրումների ծավալների և աշխատատեղերի ստեղծման բարձրացմանը:
Նախագիծը ներկայացրել է տարածքային կառավարման և զարգացման նախարար Դավիթ Լոքյանը: Նախարարի մամլո խոսնակ Կարինե Մանգասարյանը «Հետքին» պարզաբանեց, որ սա Հայաստանի ցամաքային տարածքում գործող առաջին «Դյութի Ֆրի»-ն է լինելու: Մինչ օրս «Դյութի Ֆրի» գործում էր միայն օդանավակայանում:
Դեռևս 2011-ի հունիսի 10-ին կառավարությունը որոշում էր կայացրել և թույլատրել պետական եկամուտների կոմիտեի նախագահին «Դյութի ֆրի ալյանս» ՍՊԸ հետ կնքել կառուցապատման իրավունքի պայմանագիր, որի համաձայն Սյունիքի տարածաշրջանային մաքսատան Մեղրու մաքսային կետի մերձակայքում կառուցվելու էր անմաքս առևտրի խանութ և դրա պահեստային տարածք։ Այն ենթադրում էր Սյունիքի մարզի Կարճևան գյուղի Մայրուղի-4 հասցեում գտնվող տարածքից` 800 քառ. մետր ընդհանուր մակերես ունեցող հողամասն առանց մրցույթի, 49 տարի ժամկետով, կառուցապատման իրավունքով հանձնել «Դյութի Ֆրի Ալիանս» սահմանափակ պատասխանատվությամբ ընկերությանը: Սակայն, ըստ Կարինե Մանգասարյանի, Մեղրիում ևս «Դյութի Ֆրի» չի գործում:
Բագրատաշենի մաքսակետում հող ստացած «Դյութի Ֆրի Հոլդինգ» ՍՊԸ-ն նորաստեղծ ընկերություն է: Գրանցվել է վերջերս՝ նոյեմբերի 22-ին: Ընկերության բաժնեմասի 50 տոկոսը ՀՀ տնասպորտի և կապի նախկին նախարար Գագիկ Բեգլարյանի որդունն է՝ Հրանտ Գագիկի Բեգլարյանինը: Մյուս կեսի սեփականատերը վրաստանաբնակ Դիանա Մութաֆյանն է:
Հայաստանում 2010-ից գրանցված է նաև «Դյութի Ֆրի Ալիանս» ՍՊԸ-ն, որի բաժնետերերը միջազգային ընկերություններ են, այդ թվում՝ «Դյութի Ֆրի հոլդինգ ինտերնեյշնլ»-ը:
Այս որոշմամբ, սակայն. ստացվում է, որ կառավարությունը հայաստանյան ցամաքային «Դյութի Ֆրի»-ն հանձնում է Բեգլարյանների ընտանիքին:
