Տպել
Ֆիզիկական ակտիվությունը կարող է շատ օգտակար լինել ինչպես հղի կանանց, այնպես էլ նրանց երեխաների համար: Նոր ուսումնասիրությունը ցույց է տվել, որ հղի կանանց ակտիվությունը դրական ազդեցություն է ունենում երեխաների թոքերի աշխատանքի վրա:
Օսլոյի համալսարանի գիտնականները հետազոտել են 814 երեխաների առողջական տվյալները: Գիտնականները հղիության 18-34-րդ շաբաթներում գտնվող կանանց խնդրել են լրացնել իրենց առողջության եւ ապրելակերպի վերաբերյալ հարցաթերթիկներ: Հիմնվելով նրա վրա, թե որքան հաճախ եւ որքան երկար են նրանք մարզվել, կանանց բաժանել են խմբերի՝ շատ ակտիվ, չափավոր ակտիվ եւ ոչ ակտիվ: Այնուհետեւ գնահատվել է երեք ամսական երեխաների թոքերի գործառույթը` չափելով ներշնչման ու արտաշնչման արագությունն ու օդի ծավալը:
Թոքերի գործառույթի ցածր ցուցանիշներով 47 երեխաների մայրերից 25-ը ֆիզիկապես պակաս ակտիվ են եղել: Ակտիվ մայրերի երեխաների թոքերի գործառույթը միջինում ավելի բարձր է եղել:
Նախորդ ուսումնասիրությունները ցույց են տվել, որ թոքերի աշխատանքի ցածր ցուցանիշներով երեխաների մոտ 10 տարեկանում ասթմայի զարգացման ռիսկը ավելի մեծ է: Միեւնույն ժամանակ, հետազոտողները նախատեսում են հետեւել մեծ երեխաների թոքերի գործառույթի դինամիկային եւ շնչառական հիվանդությունների զարգացման վրա դրա ազդեցությանը:
