Տպել
Թուրքիայի նախագահ Ռեջեփ Թայիփ Էրդողանը հայտարարել է, որ Վրաստանի վարչապետ Իրակլի Ղարիբաշվիլին իրեն է փոխանցել ՀՀ վարչապետ Նիկոլ Փաշինյանի հանդիպման առաջարկը։ Այդ մասին հայտնում է ադրբեջանական APA գործակալության թուրքական բյուրոն։ Վերջինիս փոխանցմամբ Էրդողանն այդ մասին հայտարարել է Նյու Յորք նախատեսվող այցից առաջ կազմակերպված մամուլի ասուլիսին, որտեղ Թուրքիայի նախագահը կմասնակցի ՄԱԿ-ի Գլխավոր ասամբլեայի հերթական նստաշրջանին։
Էրդողանը նշել է, որ եթե վարչապետ Փաշինյանը ցանկանում է հանդիպել իրեն, ապա Հայաստանը պետք է դրական քայլեր ձեռնարկի։ «Վրաստանի վարչապետն ինձ փոխանցել է Հայաստանի վարչապետ Նիկոլ Փաշինյանի հանդիպում ունենալու առաջարկը։ Բայց դրա համար Հայաստանը պետք է ձեռնարկի դրական քայլեր։ Եթե այդ հանդիպումը կայանա, ապա Թուրքիան էլ կհաստատի դիվանագիտական հարաբերություններ»,- նշել է Էրդողանը։
