Տպել
Հակահամաճարակային յուրաքանչյուր միջոցառում մշակվում է ըստ երկրում տիրող համաճարակային իրավիճակի: Այս մասին լրագրողների հետ զրույցում պատմել է ՀՀ ԱՆ Հիվանդությունների վերահսկման և կանխարգելման ազգային կենտրոնի Վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
Նրա խոսքով, հոկտեմբերի 1-ից ուժի մեջ մտնող կանոնները գործելու են աշխատող քաղաքացիների համար, քանի որ, ըստ հետազոտությունների տվյալների, ամենից հաճախ կորոնավիրուսային վարակով հիվանդանում են 25-ից 55 տարեկան մարդիկ: Այդ իսկ պատճառով, կարգավորումները դեռ չեն տարածվում ուսանողների վրա:
Սակայն, մասնագետի խոսքով, հաջորդիվ կքննարկվեն նաեւ այլ խմբերը՝ ելնելով համաճարակային իրավիճակից:
Հիշեցնենք, որ հոկտեմբերի 1-ից եթե մարդիկ պատվաստված չլինեն, պետք է 14 օրը մեկ թեստավորվեն եւ թեստի բացասական պատասխան ներկայացնեն իրենց գործատուներին:
Այս որոշմանը չհետեւող աշխատակիցները չեն կարող աշխատանքի ներկայանալ, եւ, նախարարի խոսքով, նման պարագայում գործատուն իրավունք կունենա խզելու աշխատանքային պայմանագիրը: Իսկ գործատուի նկատմամբ կարող են տույժեր եւ տուգանքներ կիրառվեն՝ որոշմանը չհետեւելու համար:
Այս որոշումը վերաբերում է բոլոր տնտեսվարող կազմակերպություններին:
