Տպել
Լոս Անջելեսի ոտնաթաթի և սրունքաթաթաթի վիրաբուժության ինստիտուտի նախագահ Արմեն Հակոբջանյանը հայ վիրաբույժների հետ բացառիկ վիրահատություն է անցկացրել Հայաստանում՝ սրունքաթաթի էնդոպրոթեզավորում։ Վնասված հոդը փոխարինվել է իմպլանտատով, և 44-օրյա պատերազմի ժամանակ ծանր վիրավորված զինվորներից մեկն այժմ կկարողանա լիարժեք կյանք վերադառնալ: Տեղեկությունը Sputnik Արմենիային հայտնեց «Eternal Nation» («Հավերժական ազգ») հիմնադրամի հայաստանյան գրասենյակի տնօրեն Աննա Միքայելյանը։
«Վիրահատությունը տևել է 2,5 ժամ և շատ լավ է անցել։ Հիվանդն արդեն լավ է զգում։ Առաջին անգամ Հայաստանում վիրահատությունն իրականացվել է հատուկ սաղավարտներով` վիրահատության գոտում առավելագույնս ստերիլ միջավայր պահպանելու համար»,- ասաց նա։
Սրունքաթաթի էնդոպրոթեզավորում
Իմպլանտատը, ինչպես նաև վիրահատության համար նախատեսված սարքավորումները, անհատույց տրամադրել է «Eternal Nation» հիմնադրամը, որը հիմնել են աշխարհի տարբեր երկրներում ապրող հայ բժիշկները։
Վիրաբույժ Հակոբջանյանին օգնել են բժիշկներ Կարեն Մարտիրոսյանն ու Յուրի Խաչատրյանը։ Հիվանդի վերականգնումը կիրականացվի ամբուլատոր պայմաններում։
«Վիրահատությունը չափազանց կարևոր էր, քանի որ հիմա զինծառայողը կարող է նորմալ կյանք վերադառնալ։ Նա երիտասարդ է և առանց այդ վիրահատության չէր կարողանա նորմալ քայլել, իսկ հիմա վազելու է, մեքենա է վարելու և նույնիսկ պարելու է», – վստահեցրեց գրասենյակի տնօրենը։
Չափազանց թանկ և բարդ այս վիրահատությունը նաև կրթական մեծ արժեք ունի. այն անգնահատելի գործնական փորձ ստանալու հնարավորություն է տվել տեղի կադրերին։ Հիմնադրամը մեծ նշանակություն է տալիս դրան, քանի որ զբաղվում է ոչ միայն վիրավոր զինծառայողների բուժման ֆինանսավորմամբ, այլև բժշկական նոր տեխնոլոգիաների ներդրմամբ ու տեղի մասնագետների ուսուցմամբ։
«Հայաստանում տարեց մարդկանց էնդոպրոթեզավորում իրականացվել էր, բայց պատերազմից հետո այդ վիրահատության կարիքն ունեն նաև երիտասարդներից շատերը։ Հիմնադրամի բժիշկները տասնյակ նման բարդ վիրահատություններ են կատարել», – նշեց Միքայելյանը։
Սրունքաթաթի էնդոպրոթեզավորում
Նշենք, որ «Հավերժական ազգ» հիմնադրամը մշակում է ինչպես կարճաժամկետ անհետաձգելի բժշկական օգնության, այնպես էլ երկարաժամկետ վերականգնողական բժշկական ծառայությունների ծրագրեր: Այն արդեն դրամահավաք է անցկացրել և ֆինանսավորել 74 զինծառայողի (85 պրոթեզ) պրոթեզավորումը։ Պատերազմի ընթացքում և դրանից հետո հիմնադրամի բժիշկները տեղի բժիշկների հետ ավելի քան 650 բարդ վերականգնողական վիրահատություններ են իրականացրել:
