Տպել
Առաջիկայում կընդլայնվի այն անձանց շրջանակը, որոնցից 14 օրը մեկ պարտադիր ՊՇՌ թեստավորման պատասխան չի պահանջվի։ Sputnik Արմենիայի հետ զրույցում հայտնեց ՀՀ առողջապահության նախարարի առաջին տեղակալ Լենա Նանուշյանը։
Նշենք, որ հոկտեմբերի 1-ից ուժի մեջ է մտել առողջապահության նախարար Անահիտ Ավանեսյանի հրամանը, ըստ որի` աշխատողը գործատուին ՊՇՌ թեստի պատասխան կամ էլ 14 օրը մեկ պատվաստման հավաստագիր պետք է ներկայացնի։ Նանուշյանը հիշեցրեց, որ 14 օրը մեկ իրենց գործատուին ՊՇՌ թեստի պատասխան կարող են չներկայացնել արդեն իսկ պատվաստված անձինք, հղիներն ու ցուցում ունեցող անձինք։
Նրա խոսքով` ևս 1-2 դեպքով էլ բացառություններ կլինեն, բայց չմանրամասնեց, թե խոսքը որ խմբերին է վերաբերելու։
Հարցին, թե արդյո՞ք նախարարությունը թեստերի գնային քաղաքականության վրա կարող է ազդել, քանի որ մարդիկ այժմ պարտավոր են թեստ հանձնել, Նանուշյանը պատասխանեց` նախարարությունը մասնավոր լաբորատորիաներում իրականացվող թեստերի գներին միջամտելու որևէ լիազորություն չունի։
Նա հիշեցրեց, որ թեստերն անվճար են նրանց համար, ովքեր ախտանշաններ ունեն։ Բացի այդ, Հայաստանում անվճար է կորոնավիրուսի բուժումն ու պատվաստումը։
