Տպել
Երեխաների ինքնասպանությունների թիվը Ճապոնիայում ամենաբարձրն է ավելի քան չորս տասնամյակների ընթացքում: Քանի որ COVID-19 համավարակի պատճառով դպրոցներն անցյալ տարի փակվել են, միջնակարգ եւ ավագ դպրոցների 415 երեխաներ ինքնասպանություն են գործել, հայտնում են տեղական լրատվամիջոցները՝ հղում անելով երկրի կրթության նախարարությանը:
Այս թիվը նախորդ տարվա համեմատ աճել է գրեթե 100-ով, դարձել է ամենաբարձր ցուցանիշը 1974թ․ հաշվառումը սկսելուց ի վեր, հաղորդել է Asahi-ն:
Ինքնասպանությունը վաղեմի պատմություն ունի Ճապոնիայում՝ որպես խայտառակությունից կամ անպատվությունից խուսափելու միջոց, իսկ ինքնասպանությունների մակարդակն արդեն վաղուց գերազանցել է G7-ի երկրների ցուցանիշները, սակայն ազգային ջանքերը 15 տարվա ընթացքում այդ թիվը նվազեցրել էին մոտ 40 տոկոսով:
Տասնամյա անկումից հետո համավարակի ֆոնին 2020թ․ ինքնասպանությունների թիվն ավելացել է, ընդ որում՝ կորոնավիրուսային համավարակի հետեւանքով առաջացած հուզական եւ ֆինանսական սթրեսի պայմաններում աճել է ինքնասպանություն գործած կանանց թիվը:
Արդյունքները ցույց են տվել, որ դպրոցի եւ տան միջավայրում համավարակի պատճառով փոփոխությունները հսկայական ազդեցություն են ունեցել երեխաների վարքագծի վրա, կրթության նախարարության ներկայացուցչին է մեջբերում NHK-ը:
